काठमाडौं । चलचित्र ‘लुट–२’ ले तीन दिनमा ४ करोड भन्दा बढी ग्रस कलेक्सन गरेको छ । शुक्रबार अल नेपाल प्रदर्शनमा आएको चलचित्रले तीन दिनमा ४ करोड २ लाख ग्रस कलेक्सन गरेको हो ।
“शुक्रबार, १ करोड ५२ लाख, शनिबार १ करोड ६५ लाख र आइतबार ८५ लाख कलेक्सन भएको रिर्पोट आएको छ,” निर्माता माधव वाग्लेले भने, “आज सोमबार विादको दिन परेकाले राम्रो कलेक्सन हुने अपेक्षा गरेका छौं ।”
विद्यमान अस्थिर राजनीतिक अवस्था, मौलाउँदो कालोबजारी र त्यसको परिणाम नै ‘लुट–२’ को ‘लगलाइन’ हो । नाकाबन्दीको मौका छोपेर तत्कालीन समयमा भएको कालो बजारी चलचित्रले छर्लङ्ग पारिदिएको छ ।
सौगात मल्ल, दयाहाङ राई, कर्मा शाक्य, प्रदीपराज न्यौपाने, विपिन कार्की, सुशिलजङ पाण्डे, सिर्जना सुब्बा र ऋचा शर्मा चलचित्रको मुख्य भूमिकामा छन् ।
‘लुट–२’ चार वर्ष अगाडि प्रदर्शनमा आएको चलचित्र ‘लुट’ को सिक्वेल हो ।
माधव वाग्ले र नरेन्द्र महर्जनको निर्माण ‘लुट–२’ निश्चल बस्नेत निर्देशित चलचित्र हो । ‘लुट–२’ नेपालसहित अमेरिका लगायका विभिन्न देशमा प्रदर्शन भइरहेको छ । अमेरिकामा ६५ सो पाएको चलचित्र वितरक कम्पनी ‘प्लानेट–३’ ले जनाएको छ ।