मुग्लिन । चितवनको नारायणगढदेखि मुग्लिनसम्मको करिब ३४ किलोमिटर सडकमा यात्रा गर्न अहिले जो कोही डराउँछन् । 

जहाज चढ्न नसक्ने, टिकट नपाउने र कुनै विशेष बाध्यता भए मात्रै, नत्र यात्रुहरु बाईरोड या जहाजमै यात्रा गर्न थालका छन् । कारण एउटै हो, गन्तव्यमा पुगिएला की नपुगिएला भन्ने चिन्ता । यात्रा गर्नै परे पनि यात्रुहरु डराईडराई हिँड्छन् । 

कतिबेला पहिरो आउने हो भन्ने चिन्तामै कट्छ मुग्लिन सडक । मुग्लिनबाट छिरेपछि रातमा निद्रा लाग्दैन भने दिनमा भोक हराउँछ । एकजना यात्रु युवराज दवाडी कहिल्यै हिंड्न नपरे जस्तो हुने बताउँछन् ।

“यो सडक ज्यानमारा सडक बन्दै गएको छ,” दवाडीले भने, “छिटो सडक निर्माणको काम भ्याउनुपर्यो ।”

नारायणगढ–मुग्लिन सडक आयोजनाले अहिले यहाँ सडक विस्तारको काम जारी राखेको छ । तर अत्यन्तै सुस्त गतिमा । 

यही बैशाखबाट सक्नुपर्ने निर्माण कार्य आधा मात्रै भएको छ । अझै आधा काम गर्न बाँकी रहेको आयोजनाका ईन्जिनियर शिव खनाल बताउँछन् । भन्छन्, “आगामी पुससम्म म्याद थपिएको छ, त्यो बेलासम्म निर्माण सकिने अवस्था देखिएको छैन ।”
६ वटा निर्माण कम्पनीले यहाँ काम गर्छन् । ३ वटा ब्लक छुट्याएर काम भैरहेको छ । दिउँसो १० देखि ४ बजेसम्म सडक बन्द गरेरै निर्माण हुन्छ । तरपनि प्रगति न्यून छ । 

सडक निर्माण ढिला हुनु, विभिन्न ठाउँमा जोखिम बढ्नु चट्टाने पहाडहरु देखिनु, फसफसे नअडिने माटो र भिरालो पहाड हुनु लगायत यहाँका जोखिमका कारणहरु हुन् । अहिले सबै क्षेत्रमा भित्तो काटिएकाले स्वभाविक रुपमा माथिल्लो भाग झर्छ ।  जोखिम पहिचान गरेर सावधानी नअपनाएको पनि होईन तर त्यसले मात्रै पनि जोखिम रोक्न सकेको छैन ।

शुरुमा २०७२ सालको महाभुकम्पले थिलथियो बनाएको उक्त पहाड, त्यसपछि निर्माणको कामले तिब्रता पाएर भित्तो काटिएपछि जोखिम उच्च भएको दावी गर्छिन, एकजना यात्रु संगिता भट्टराई । प्रायः बाटोमा यात्रा गरिरहेका बेला यहाँ कुनै स्थानमा ढुंगा झरिरहेकै हुने उनी बताउँछिन् ।

दुर्घटना पनि बढ्दो 

पछिल्लो केही बर्ष यता दुर्घटनाबाट मानविय क्षतिको क्रम बढेको छ । जिल्ला ट्राफिक प्रहरी कार्यालय चितवनका अनुसार उक्त सडकमा एक बर्षमा पहिरो र आफैं अनियन्त्रित भएर दुर्घटनाका २७ वटा घटना भएका छन् । त्यसमा ४४ जनाको मृत्यु भएको छ ।  १९ जना वेपत्ता भएको तथ्यांक छ । 

सबैभन्दा बढी त्यही कालिखोलामा छन् । यहाँको कालिखोला सबैभन्दा बढी जोखिमा छ । कालिखोलामा गएको भदौ १० गते रौतहटबाट पोखरा जाँदै गरेको ग १ ख ३७०९ नम्बरको यात्राबाहक बस अनियन्तित्र भई दुर्घटना हुँदा २५ जनाको ज्यान गएको थियो ।

शुक्रबार बिहान प्रहरकिो भ्यान पहिरोले बगाएको नजिकै उक्त दुर्घटना भएको छ । सो क्षेत्रमा पटकपटक २ वटा ट्रक समेत दुर्घटनामा परेको ट्राफिक प्रहरी जवान विश्व नेपाल बताउँछन् । फागुन ११ गते पनि एउटा बोलेरो दुर्घटना हुँदा २ जनाको मृत्यु र ४ जना घाईते भएको उनी बताउँछन् । जलविरेमा पनि एउटा ट्रक खसेर बेपत्ता भयो । यसले यसरी यो क्षेत्रमा दुर्घटनाको जोखिम भएको देखाउँछन् । 

पहिरोको उच्च जोखिम, त्रास उस्तै 

चैत २१ गते सुख्खा चट्टाने पहिरो खस्दा उक्त सडकको घुमाउनेमा २ जनाको मृत्यु भयो । बा १० प ४८४४ नम्वरको मोटरसाईकलमा रहेका लम्जुङ सुन्दरबजारका रेशमराज रानाको ढुंगामा च्यापिएर मृत्यु भयो ।

ना ४ ख ५४१९ नम्बरको ट्याङ्करका सहचालक भारतका २५ वर्षिय विनय कुमार कोईरीको सोही ठाउँमा पुरिएर ज्यान गयो ।

अन्य पाँच वटा सवारी क्षती भए । त्यसपछि शुक्रबार बिहानको यो अर्काे ठुलो घटना हो । पहिरो खस्ने क्रम भने हप्तैपिच्छे हुने गरेको छ । यात्रुहरुले पाउने सास्ती भने दैनिक नै भएको चितवनका प्रहरी प्रमुख दिपक थापा बताउँछन् । 

शुक्रबार कालिखोलामा पहिरोसँगै ट्रक र प्रहरीको भ्यान बग्दा २ प्रहरीको मृत्यु भएको छ भने २ प्रहरी र भ्यान बेपत्ता छ । ट्रक भिरमा अड्किएको अवस्थामा छ ।
उनले यस्ता जोखिमहरु पहिचान गरेर ठुलोसाबधानी अपनाउने गरिए पनि कतिबेला घटना भैरहेको गरेको बताउँछन् ।

यसरी भएको थियो घटना 

बिहीबार पौने दश बजे बजे ईच्छाकामना गाउँपालिका ६ को चारकिलोमा पहिरो गयो । ईलाका प्रहरी कार्यालय मुग्लिनका प्रहरी सहायक निरिक्षक निश्चल तामाङको नेतृत्वमा बाटो खुलाउन प्रहरी गए । उनीहरुले एकतर्फी बाटो खुलाएर फर्किँदै थिए ।

राती १ बजेर ५ मिनेटको समयमा कालीखोला भिषण पहिरो खस्यो । ईलाका प्रहरी कार्यालय मुग्लिनको ना १ झ १३९० नम्बरको गाडी ४ प्रहरीसहित बग्यो । सँगै मुग्लिनतर्फ गैरहेको  ना ५ ख ७८२७ नम्बरको ट्रक पनि सँगसँगै बग्यो ।

धादिङ खनियाबास गाउँपालिका ४ का २९  वर्षीय प्रहरी सहायक निरिक्षक निश्चल  तामाङ र बारा हरैया ६ का ३० वर्षीय प्रहरी जवान तथा गाडी चालक दिपक मास्के मृत भेटिए । 

गोर्खा मकैसिंह १ का प्रहरी जवान लिलबहादुर चेपाङ र तनहु घर भएका २१ वर्षीय प्रहरी जवान सन्दिप कार्की बेपत्ता छन् । उक्त ट्रकका चालक र सहचालकलाई उद्धार गरि उपचारको लागि पठाईएको प्रहरीले जनाएको छ । यसपटक भने नयाँ स्थानमा पहिरो खसेको ईन्जिनियर खनाल बताउँछन् ।

मुग्लिन–नारायणगढ सडक फेरि बन्द, ४ ठाउँमा पहिरो 

चितवन  । गएरातिदेखि चितवनको मुग्लिन–नारायणगढ सडकखण्ड पहिरोले बन्द हुन पुगेको छ । नारायणगढ–मुग्लिन सडकखण्ड अन्तरगत विभिन्न ४ स्थानमा पहिरो खसेर बन्द हुन पुगेको हो ।
ईच्छाकामना गाउँपालिकाको वडा नम्बर ६ मा पर्ने कालिखोला , २ किलो, ४ किलो र खहरेमा पहिरो खसेको चितवन प्रहरीले जनाएको छ ।
राती ९ बजे खसेको पहिरो अझै खुलन सकेको छैन । बिहान साढे ४ बजेखि पहिरो पन्छाउन थालिएको छ । रातभर बर्षा र पहिरो खस्ने क्रम देखिएकाले पहिरो हटाउन जान सकिएन ।
प्रहरीले अहिले बैकल्पिक सडक प्रयोग गर्ने भनेको छ । यसअघि शुक्रबारको पहिरोले कालिखोलामा एउटा ट्रकसहित प्रहरीको भ्यान बगाएको थियो । जसमा २ प्रहरी मृत भेटिएका थिए भने २ प्रहरी वेपत्ता छन् । प्रहरीको भ्यान पनि बेपत्ता नै छ ।