काठमाडौं । नेसनल टे«डिङ लिमिटेडबाट अहिले दैनिक करिब डेढ सयको संख्यामा इण्डक्सन चुलो बिक्री भइरहेको छ । भारत सरकारले नाकाबन्दी गरेकोे समयमा एलपी ग्यास अभाव भएपछि चीन सरकारले नेपाललाई अनुदान दिएको उक्त चुलोकोे मूल्य तीन तिहाइ घटाइएपछि अहिल बिक्री भएको हो ।
नाकाबन्दी अवधिमा उक्त चुलोको मूल्य सरकारले ११ हजार ९९५ रुपैयाँ निर्धारण गरेको थियो । चुलोको मूल्य महँगो भएपछि एक सेट बाहेक बिक्री हुन सकेको थिएन । २०७२ मंसिरमा चीन सरकारले स्थलमार्ग हुँदै केरुङ्ग नाकाबाट १३ सय र हवाइमार्गबाट १० हजार इण्डक्सन चुलो नेपाल पठाएको थियो ।
चुलोको मूल्य महँगो भएपछि सरकारको आलोचना भएकोे थियो । त्यसपछि पछिल्लो समय संसदको उद्योग वाणिज्य तथा उपभोक्ता हित सम्बन्ध समितिले चुलोको मूल्य घटाएर बिक्री गर्न निर्देशन दिएको थियो । त्यस्तै अर्थ मन्त्रालयले समेत मूल्य घटाउन दिएको स्वीकृतिपछि कम्पनीलाई मूल्य घटाउन बाटो खुलेको थियो ।
कम्पनीको उपत्यकाका बिक्री वितरण व्यवस्था कार्यालय प्रमुख श्याम श्रेष्ठले अहिले कम्पनीले चार हजार रुपैयाँमा इन्डक्सन चुलो र चुलोमा प्रयोग हुने एउटा भाँडो उपलब्ध गराइरहेको बताए । “बिक्री सुरु भएयता दैनिक एकदेखि डेढसयको संख्यामा चुलो बिक्री भइरहेको छ,” उनले भने, “चुलो किन्नका लागि ग्राहकहरु लालायित भएका देखिन्छन् ।”
उनका अनुसार चुलो शुक्रबारदेखि बिक्री सुरु भएको हो । मंगलबारसम्ममा ४ सय सेट बिक्री हुने अनुमान कर्मचारीको छ । कम्पनीमा रहेको सबै चुलो बिक्री भइसक्न अझै करिब दुई महिना लाग्ने देखिन्छ । अझै टे«डिङमा ९ हजार ६ सय थान बिक्री हुने क्रममा रहेको उनको भनाइ छ ।
जेठ तेस्रो हप्तामात्रै पनि कम्पनीले ६ दिनको अवधिमा १३ सय इन्डक्सन चुलो बिक्री गरेको थियो । त्यस अवधिमा चुलो खरिद गर्न टे«डिङमा ग्राहकहरुको ठूलै भिड लागेको थियो ।