काठमाडौं । लण्डनमा जारी वर्ल्ड एथ्लेटिक्स च्याम्पियनसिप अन्तर्गत चार गुणा सय मिटर रिले दौडका क्रममा जमैकन धावक उसेन बोल्ट ट्रयाकमै लडेका छन् । करियरको अन्तिम दौडका रुपमा चार गुणा सय मिटर रिले दौडेका धावक बोल्ट घुँडाको चोटकाकारण ट्रयाकमै लडेका हुन् ।
दौडकै क्रममा ट्रयाकमा ढलेपछि बोल्टलाई उनका साथीहरुले फिनिसिङ लाइन पार गराएको थिए । करियरको अन्तिम दौड पूरा गर्न नसकेपछि शताब्दीकै उत्कृष्ट चाँडो दौडने धावक बोल्टको बिदाइ सुखद हुन सकेन ।
गत वर्ष ब्राजिलमा सम्पन ओलम्पिकमा यस स्पर्धामा बोल्ट सम्मलित जमैकाले स्वर्ण जितेको थियो । यस स्पर्धामा जमैकाको नाममा ३६.८४ सेकेन्डको विश्व किर्तिमान समेत रहेको छ । ओलम्पिक खेलकुदमा आठ पटक स्वर्ण जितेका बोल्टको यो च्याम्पियनसिप अन्तिम प्रतियोगिता हो ।
यस स्पर्धामा जमैका आठौं स्थानमा रह्यो । यस स्पर्धामा ग्रेट ब्रिटेनले ३७.४७ सेकेन्डको समय निकाल्दै स्वर्ण जित्यो । यस्तै ३७.५२ सेकेन्डमा दौड पूरा गरेको अमेरिकाले रजत पदक जित्दा जापानले कास्य पदक हात पार्यो ।