काठमाडौं । साउदी अरबमा घरेलु कामदारका रूपमा मानव बेचविखन गर्नेलाई १५ वर्षको जेल सजाय र एक मिलियन साउदी रियाल वा दुवै सजाय हुने भएको छ ।
घरेलु कामदार बेचविखनका कारण सुरक्षा, आर्थिक विकास र सामाजिक मर्यादामा असर परेकाले यस्तो नियम ल्याइएको साउदी अरबको श्रम तथा सामाजिक विकास मन्त्रालयका प्रवक्ता खालिद अब्बा अलखालीलाई उद्धृत गर्दै अरबन्युजले लेखेको छ ।
घरेलु कामदार बेचविखनका विषयमा मन्त्रालय र सामाजिक सुरक्षा विभागले अनुसन्धान गरिरहेको अलखालीले जनाएका छन् । साउदीमा घरेलु कामदार छनोट गर्दा विभिन्न संस्था र व्यक्तिले श्रम ऐनको उल्लंघन गर्ने गरेकाले त्यस्तालाई कारबाही गर्ने मन्त्रालयले जनाएको छ ।
यसैबीच साउदीस्थित उपभोक्ता संरक्षण संघले वैदेशिक रोजगार र घरेलु कामदार भर्तिका विषयमा कार्यशाला आयोजना गरी परिचर्चा गरेको छ ।
संघले विभिन्न मुलुकका दूतावासका प्रतिनिधिसँग छलफल गरेको थियो । छलफलमा संघका महासचिव अब्दुर रहमान अल काटानीले साउदी अरबमा घरेलु कामदारको भर्तीका विषयमा समस्या उत्पन्न भएको बताए । उनले यसको व्यवहारिक समाधानका लागि ठोस प्रयास र समर्थन आवश्य रहेको उल्लेख गरे ।
फिलिपिन्स, श्रीलंका र बंगलादेशलगायतका दूतावासका प्रतिनिधिले कार्यशालामा भाग लिएका थिए । ती देशका प्रतिनिधिले श्रमको वृद्धि, तलब वृद्धि र महिला श्रमिकको मुद्दा उठाएका थिए ।
स्थानीय प्रथा, अन्य देशको अभ्यास र दुई देशका एजेन्ट बीच संचारको कमीका कारण समस्या उत्पन्न भएको कार्याशलामा बताइएको थियो ।