काठमाडौं । प्रधानमन्त्री शेरबहादुर देउवाले मध्य र सुदुरपश्चिमका तीन जिल्लाका बाढी प्राभावितलाई राहत वितरण गर्दै प्रभावित क्षेत्रको अवलोकन गरेका छन् ।
बिहीबार बिहान प्रधानमन्त्रीले बाँकेको राप्ती सुनारी गाउँपालिकाको कमैया डाँडा, बर्दियाको कोठीयाँ गाउँपालिका र कैलालीको टिकापुरमा बाढीबाट बिस्थापितहरुसँग छलफल गरी राहत सामाग्री वितरण गरेका हुन् ।
प्रधानमन्त्रीले बाँकेको कमैयाडाँडामा बाढीबाट आफ्ना ११, ९ र ७ बर्षका तीन छोरी गुमाएका कमिलाल थारुलाई ६ लाख रुपैयाँको चेक दिएका छन् ।
प्रधानमन्त्री देउवाले तीन छोरी गुमाएका थारुलाई घर बनाउन सरकारले आर्थिक सहयोग गर्ने घोषणा पनि गरेका थिए । ‘बाढीबाट धनजन गुमाएका हरुलाई सरकारले क्षतिपूर्ति रकम र घर बनाउनको लागि पनि निश्चित रकम दिनेछ’ उनले भने, ‘अहिले तत्काल अस्थायि बासस्थानका लागि पनि केही रकम निकासा गरिसकेको छ, छिट्टै तपाईहरुले पाउनुहुने छ ।’
त्यसैगरी उनले बर्दियाको गुलरीय नगरपालिकाको बाढी प्रभावित वडा नम्बर ८ को कोठियाँ गाउँमा पनि भेटघाट गरी राहत वितरण गरे ।
देउवाले बाढीको दिर्घकालिन र तात्कालिन समाधानका लागि सरकारले छिट्टै नयाँ कार्यक्रम ल्याउने जानकारी दिए ।
उनले घाइतेको उपचार सरकारले निःशुल्क गर्ने व्यवस्था गरेको बताउँदै बाढीले घर बगाएका हरुलाई पनि सरकारले निर्णय गरेर रकम निकासा गर्ने बताए ।
त्यस्तै कैलालीको टिकापुरमा पनि प्रधानमन्त्रीले बाढी पीडितहरुलाई खाद्यन्न, लत्ताकपडा र उपचारमा सरकारले कुनै कसर बाँकी नराख्ने बताएका छन् ।
राहत, उद्दार र क्षतिपुर्ति प्रभावकारी बनाउन निर्देशन
यसैगरी प्रधानमन्त्रीले मध्य र सुदूरपश्चिमका सेना, प्रहरी, शसस्त्र प्रहरी लगायत क्षेत्रीय प्रशासक र प्रमुख जिल्ला अधिकारीहरुलाई राहत, उद्दार र क्षतिपूर्ति वितरणमा कुनै कमजोरी नहुने गरी काम गर्न निर्देशन दिएका छन् ।
बाँकेको नेपालगंञ्जमा बाढी प्रभावित क्षेत्रको उद्दार र राहतमा खटिएका सुरक्षा निकायका अधिकारीहरु र उच्चपदस्थ कर्मचारीलाई निर्देशन दिदै उनले भने, “प्राकृतिक विपत्तीमा परेकालाई कुनै गुनासो नहाउने गरी काम गर्नहोस् ।”