काठमाडौं । हरेक वर्षझैं यो वर्ष पनि तिहारको समयमा सुनको कारोबार बढेको छ । अहिले दैनिक ६० केजी सुन बिक्री भइरहेको नेपाल सुन चाँदी व्यवसायी महासंघले जनाएको छ ।

धनतेरसको पूजा गर्ने भएकाले तिहारमा अन्य समयको तुलनामा सुनको माग उच्च हुने गरेको छ । करिब एक साता दैनिक ६० केजीसम्म सुन बिक्री हुने संघका महासचिव दियशरत्न शाक्य बताउँछन् । 

एक किलो सुनको मूल्य करिब साढे ४८ लाख पर्छ । यो मूल्यले दैनिक २९ करोड १० सुनको कारोबार भइरहेको छ । एक हप्तामा २ अर्बभन्दा बढी रुपैयाँको सुनको कारोबार हुन्छ । 

धनतेरसमा सुन, चाँदी, तामाका सिक्का, पैसा तथा गहना राखेर पूजा गर्ने चलन छ । सुरुमा भारतमा मनाइने यो पूजा नेपालमा पनि मनाउन थालेपछि तिहारमा सुन खरिद गर्नेको संख्या बढ्ने गरेको हो । 

महासंघका अनुसार औसतमा चाडपर्वमा सुनको माग दैनिक ४५ किलो हुने गरे पनि तिहारमा मात्रै भने ६० किलो हुने गरेको छ । गाउँमा भने तिहारमा भन्दा तीजमा धेरै सुन किन्ने गरेको पाइन्छ । 

धनतेरसमा चाँदी पनि राखेर पूजा गर्ने भएकाले यसको माग पनि उच्च हुने गरेको महासंघले जनाएको छ । दैनिक औसत साढे ४ सय किलो बिक्री हुने चाँदी अहिले दैनिक ७ सय किलो बिक्री हुने महासंघका अध्यक्ष मोहनबहादुर बिकले जानकारी दिए । एक किलो चाँदीको मूल्य ६६ हजार रुपैयाँ पर्छ । दैनिक ४ करोड ६२ लाख रुपैयाँको चाँदी बिक्री भइरहेको छ । यो तथ्यांक अनुसार तिहारको यो साता ३२ करोड ३४ लाख रुपैयाँ बराबरको चाँदी बिक्री हुने महासंघका अध्यक्ष बिकले जानकारी दिए । 

सुनको माग उच्च भएपनि सरकारले व्यवसायीलाई दैनिक २० किलो सुन उपलब्ध गराउँदै आएको छ । महासंघले यो कोटा बाढाएर सामान्य दिनमा २५ किलो र सिजनमा दैनिक ३० किलो माग गर्दै आएको छ । 

“सरकारले हामीले मागेजति दियो भने पनि माग धान्न त्यही सुनले त पुग्दैन तर हामीसँग रहेको स्टक र फिर्ता आएको सुनले ग्राहकको माग धान्छौं,” महासचिव शाक्यले भने, “हामीले १५ किलोबाट कोटा बढाएर २० किलो पुर्याउन ५ वर्ष कुर्नुपर्यो । हेरौं, यो पटक सरकारले कति समय लगाउँछ । मन्त्रालयमा कुरा गर्दा उहाँहरु सकारात्मक कुरा गर्नुहुन्छ, आशा गरौं हाम्रो मागको चाँडै सुनुवाइ हुन्छ ।”