एजेन्सी । युरोपा लिग फूटबलमा एभर्टन पराजित भएको छ । बिहीबार राति भएको खेलमा एभर्टन फ्रेन्च क्लब लियोनसँग २–१ ले पराजित भएको हो ।
एभर्टनको घरेलु मैदानमा भएको खेलमा लियोनलाई जित दिलाउन नविल फकिर र बेट्रान्ड ट्राओरेले समान एक एक गोल गरे । एभर्टनका कप्तान एस्ले विलियम्सले एक गोल फर्काए । तर, प्रतिस्पर्धात्मक बनेको खेलको दोस्रो हाफमा एभर्टनका खेलाडी र समर्थकहरु विपक्षी खेलाडीलाई कुटपिट गर्न पुगेका थिए ।
एक गोलले पछि परेको स्थितिमा एभर्टनका क्याप्टेन विलियम्स लियोनका गोलरक्षक एन्थोनी लोप्स एकआपसमा ठोक्कीएपछि खेलमा विवाद चर्किएको थियो । त्यही विवादमा विलियम्सले लियोनका किपरलाई मैदान बाहिरतर्फ धकेलेका थिए । त्यसपछि एभर्टनका समर्थकहरुले लियोनका किपर लोप्समाथि एक्कासी आक्रमण गर्न पुगेका थिए । तर, यो खेलमा एभर्टनका विलियम्स भने रेड कार्डबाट जोगिएका थिए । उनले पहेलो कार्ड मात्र पाए ।
यो हारपछि समूह इ मा रहेको एभर्टनले ३ खेलबाट १ अंक जोडेर पुछारमा रहेको छ । यो समूहमा लियोन ५ अंकसहित दोस्रो स्थानमा रहदा ७ अंक जोडेको एटलान्टा शिर्ष स्थानमा छ ।