काठमाडौं । दिपावली सुरु भएसँगै तरकारी तथा फलफूलको भाउ बढेको छ । काठमाडौं उपत्यकामा हप्ता दिन अघिभन्दा अहिले तरकारी तथा फलफूलको मूल्य बढेको छ । तरकारी उत्पादक किसान तथा व्यवसायी लगायत दिपावलीमा व्यस्त भएको कारणले पर्याप्त मात्रामा तरकारी तथा फलफूलको आपूर्ति हुन नसक्दा मूल्यमा प्रभाव परेको व्यवसायीहरुको भनाइ छ ।
कालिमाटी फलफूल तथा तरकारी बजार विकास समिति अनुसार हप्तादिन अघिको तुलनामा दिपावली सुरुभएसँगै बजारमा प्रतिकिलो तरकारीको होलसेल मूल्य ६० रुपैयाँसम्म बढेको छ । समितिको अनुसार हप्तादिनमा बजारमा च्याउको होलसेल मूल्य प्रतिकिलो ६० रुपैयाँसम्म बढेको हो । गएको हप्ता रू. १०५ रुपैयाँ रहेको च्याउको मूल्य अहिले १६५ रुपैयाँ बढेर पुगेको छ ।
त्यस्तै गएको हप्ता ४५ रुपैयाँ प्रतिकिलो रहेको काँक्राको मूल्यमा अहिले ४० रुपैयाँ बढेर रू. ८५ पुगेको छ । ५२ रुपैयाँ रहेको परवर रू. ४६ बढेर ९८ रुपैयाँ पुगेको छ ।
प्रतिकिलो हरियो खुर्सानीको होलसेल मूल्यमा २७ रुपैयाँ , स्थानिय काउलीमा १०, मूलामा १६, घिरौलामा १०, हरियो फर्सीमा १० रुपैयाँ बढेकोे छ । बढेर ती तरकारीहरुको प्रतिकिलो मूल्य अहिले १२५, ७२, ३८, ४८ र ४८ रुपैयाँ पुगेको छ ।
फलफूलको मूल्य पनि बढ्यो
समितिको अनुसार हप्तादिनमा फलफूलको मूल्य पनि बढेको छ । गएको हप्ताको तुलनामा अहिले प्रतिकिलो फलफूलको होलसेल मूल्य ४७ रुपैयाँसम्म बढेको छ । गएको हप्ता प्रतिकिलो ४८ रुपैयाँ रहेको नासपाती अहिले बढेर ९५ रुपैयाँ पुगेको छ । गएको हप्ता ४५ रुपैयाँ रहेको केरा अहिले २० रुपैयाँ बढेर रू. ६५ पुगेको छ । १४५ रुपैयाँ रहेको अनार १० रुपैयाँ बढेर १५५ रुपैयाँ पुगको छ ।
त्यस्तै तरबुजामा प्रतिकिलो १७ रुपैयाँ, मौसमीमा प्रतिकिलो १०, मेवामा १० बढेको छ । बढेर ती फलफूलको मूल्य प्रतिकिलो बढेर अहिले क्रमशः ६५, ६५, र ७५ रुपैयाँ पुगेको छ ।
समितिका अनुसार करिब दुई दर्जन तरकारी तथा फलफूलको मूल्य बढेको छ ।