काठमाडौं । नेपाली यु–१९ क्रिकेट टिमले भारतलाई पराजित गर्दै ऐतिहासिक जित हात पारेको छ । मलेसियामा जारी एसीसी यु–१९ एसिया कप क्रिकेटको दोस्रो खेलमा नेपालले भारतलाई १९ रनले पराजित गरेको हो ।
भारतलाई पराजित गरेसँगै नेपालको सेमिफाइनल पुग्ने सम्भावना पनि बढेको छ ।
१ सय ८६ रनको सामान्य चुनौती पछ्याउँदै ब्याटिङ गरेको भारतले ४८.१ ओभरमा सबै विकेटको क्षतिमा १६६ रनमात्रै बनाउन सक्यो । भारतका लागि कप्तान हिमांशु रानाले ४६, मन्जोत केर्लाले ३६ र अभिषेक शर्माले २७ रन बनाएका थिए । भारतका अन्य ब्याट्सम्यान भने सस्तैमा आउट भए । भारतका अनुज रावतले १८ र अथर्भा टाइडेले १३ रनको योगदान दिए पनि नेपालमाथि जित हात पार्न सकेन ।
नेपालको जितमा कप्तान दिपेन्द्रसिंह ऐरीले उत्कृष्ट प्रदर्शन गरे । उनको अलराउण्डर प्रदर्शनमा नेपालले भारतमाथि ऐतिहासिक जित दर्ता गराएको हो । नेपालका दिपेन्द्रसिंह ऐरीले ४, शाहब आलम र पवन सर्राफले समान २–२ विकेट लिए ।
यसअघि मलेसियाको क्वालालम्पुरस्थित बायुमस ओभलमा टस हारेर पहिले ब्याटिङ गरेको नेपालले पूरै ५० ओभर खेल्दै ८ विकेट गुमाएर १८५ रन बनाएको थियो । नेपालको मध्यम स्कोरमा कप्तान दिपेन्द्र सिंह ऐरीले उत्कृष्ट ब्याटिङ प्रदर्शन गरे । अर्धशतकीय पारी खेलेका दिपेन्द्रले ८८ रनको योगदान दिए ।
त्यस्तै नेपालका जितेन्द्र सिंह ३६ रन जोड्दा भीम सार्कीले १५ रन जोडे । सन्दिप लामिछाने ९ तथा किशोर महतो ७ रनमा अविजित रहे । त्यसबाहेक नेपालका अनिल कुमार साह र रोहित कुमार पौडेलले समान ६–६ रन बनाउँदा कमल सिह ऐरीले ५ तथा आसिफ शेखले ३ रन बनाएर पेभेलियन फर्किए ।
भारतका आदित्य थाक्रे र अबिषेक शर्माले समान २–२ विकेट लिए ।
जितपछि नेपाली क्रिकेट टिमका मुख्य प्रशिक्षक विनोद दासले खेलाडीको कडा परिश्रमले नै भारतमाथि ऐतिहासिक जित निकालेको बताए । उनले भने, “यो जित खेलाडीको कडा मेहनतले सम्भव भएको हो । हामी प्रत्येक प्रतिद्धन्दी विरुद्ध राम्रो तयारी गर्छौ र हामी सफल भएका पनि छौं । दिपेन्द्रले उत्कृष्ट अलराउण्डर प्रदर्शन गरे ।”
दिपेन्द्रसिंह ऐरीको अलराउण्ड प्रदर्शन
भारतमाथि ऐतिहासिक जित हात पार्दा कप्तान दिपेन्द्रसिंह ऐरीले शान्दार प्रदर्शन गरे । उनकै कप्तानीमा आईपुगेर भारतलाई पहिलो पटक नेपालले पराजित गर्न सम्भव पनि भयो । टस हारेर पहिले ब्याटिङ गरेको नेपालको इनिङ्स सम्हाल्दै सम्मानजनक स्कोर बनाएका थिए । दिपेन्द्रले ८८ रनको योगदान दिदै नेपाललाई उकासेका थिए । उनले १०१ बलमा ६ चौका र २ छक्का प्रहार गरेका थिए ।
बलिङतर्फ पनि कप्तान दिपेन्द्रसिंह ऐरीले धारिलो बलिङ गरे । उनले १० ओभर बलिङ गर्दै २ ओभर मेडनसहित ३९ रन खर्चेर ४ विकेट लिए । भारतीय ब्याट्सम्यान उनको कफायती बलिङको सिकार बनेका थिए ।
सेमिफाइनल पुग्ने सम्भावना बलियो
भारतलाई पराजित गरेसँगै नेपालको सेमिफाइनल पुग्ने सम्भावना बलियो बनेको छ । नेपालसँगै समूह ए मा रहेको नेपाल दोस्रो स्थानमा उक्लिएको छ । शीर्ष स्थानमा भारत रहेको छ भने तेस्रो स्थानमा बंगलादेश रहेको छ । भारतले अब अन्तिम खेल बंगलादेशसँग खेल्नेछ ।
यता, नेपालले भने आफ्नो अन्तिम खेलमा आयोजक मलेसियासँग प्रतिस्पर्धा गर्नेछ । मलेसियालाई पराजित गर्न सके नेपाल सेमिफाइनलमा पुग्न सक्छ । तर, बंगलादेशले मलेसियासँग र भारत खेल्न बाँकी रहेको छ । नेपालले आफ्नो अन्तिम खेल मंगलबार मलेसियासँग खेल्दैछ ।
अहिलेसम्म नेपालले पराजित गरेका टेष्ट नेशन राष्ट्र
नेपाली क्रिकेट उमेर समूहमा निकै अब्बल मानिन्छ । नेपाली युवा टिमले निकै राम्रो प्रदर्शन गर्दै टेष्ट नेशन राष्ट्रलाई पराजित गरेको छ । अहिलेसम्म नेपालले टेष्ट नेशन राष्ट्रमाथि न्युजिल्याण्डलाई २ पटक पराजित गरेको छ । त्यस्तै, दक्षिण अफ्रिकालाई पनि नेपाली यु–१९ टिमले २ पटक पराजित गरेको छ । त्यस्तै नेपालले पाकिस्तानलाई पनि १ पटक पराजित गरेको छ । जिम्बाब्वेलाई पनि नेपालले १ पटक पराजित गर्दै टेष्ट राष्ट्रमाथि नेपालको उपस्थिति सधै निकै बलियो हुने गरेको छ । नेपालले भारतलाई भने यसअघिसम्म पराजित गर्न सकेको थिएन । पहिलो पटक नेपालले भारतलाई पराजित गर्दै इतिहास रचेको हो ।