पाँचथर । हिंसारहित निर्वाचन सम्पन्न गर्न मादक पदार्थ सेवन वहिष्कार गरां’ भन्ने मूलनाराका साथ पाँचथर सदरमुकाम फिदिममा आज युवाहरुले ¥याली निकालेका छन् ।
सम्पूर्ण पार्टीका भातृसंगठन र अन्तरसंवाद समिति पाँचथरको आयोजनामा फिदिमस्थित क्याम्पसमोडबाट निकालिएको ¥याली फिदिम माविको प्रांगणमा पुगेर सम्पन्न भएको थियो ।
त्यसपछि सोही माविको प्रांगणमा निर्वाचन मतदाता शिक्षा नमूना मतदान कार्यक्रम सञ्चालन गरिएको थियो । ‘आफ्नो मत खेर नफालौं, सक्षम कुशल नेतृत्व चयन गरौँ’ भन्ने उद्देश्यका साथ ¥याली र नमूना मतदान सञ्चालन गरेको संवाद समिति संयोजक प्रदीप बाँस्कोटाले जानकारी दिए ।
उनले भने, “चुनावमा मादक पदार्थ र पैसाको भरमा मत हाल्ने प्रवृतिको अन्त्य गर्न भन्दै यो ¥याली निकालिएको हो ।”
युनडिपी, जिल्ला निर्वाचन कार्यालय पाँचथर, हुकोडेक नेपाल, नेपाल जनउद्धार संघ, पञ्चमी युनेस्कोको सहयोगमा ¥याली निकालिएको उनले बताए । रासस