एजेन्सी । आजभोलि जवान महिलाहरु मात्र नभएर वृद्ध र बच्चाहरु समेत बलात्कारको शिकार हुने गरेका छन् । यस्तैमा ८८ वर्षीया एक वृद्ध महिलाले भने आफ्नो इज्जत बचाउन बलात्कारीहरुलाई अनौठो उपाय लगाएर भगाएकी मीररमा प्रकाशित समाचारमा उल्लेख छ ।
अमेरिकाको पेन्सिलवेनियाको पार्केबर्गमा बस्ने हेलेन रिनोल्ड्स यसै घटनाका कारण चर्चामा आएकी छन् । वृद्ध भएपनि आफ्नो बुद्धिको उपयोग गरेर उनले आफूलाई बचाउन सफल भएकी हुन् । उनी घरमा एक्लै भएका समयमा दुई लुटेराहरु आएका थिए । भित्र पस्नासाथै तिनीहरुले हेलेनको हातखुट्टा बाँधिदिएर मुखमा पट्टी लगाइदिएका थिए । घर लुटिसकेपछि भने उनीहरु हेलेनको बलात्कार गर्न अगाडि बढ्न थाले । तर त्यसै समय उनले भनेको एउटा कुरा सुनिसकेपछि ती दुवै लुटेराहरु उनका घरबाट तुरुन्तै निस्किएर गएका हुन् ।
अपराधीहरु त्यसरी हेलेनतर्फ बढिरहेको समयमा उनले ती दुवैलाई एउटा झुटो कहानी सुनाएकी थिइन् । उनले तिनीहरुलाई आफू एच आइ भी संक्रमित भएको भन्दै झुटो बोलिन् ।
यति मात्र नभएर उनले तिनीहरुलाई आफ्नो पतिको पनि यसै संक्रमणबाट केही दिनअघि मात्र मृत्यु भएको बताइन् । उनलाई एड्स भएको सुन्ने बित्तिकै ती दुवै अपराधीहरु पहिले त अलमल्ल परे । त्यसपछि भने उनका कुरामा विश्वास गर्दै उनीहरुले तिनलाई त्यतिकै छाडि त्यहाँबाट भागेका थिए ।
यसरी वृद्ध भएर पनि आफ्नो बौद्धिक क्षमताका कारण हेलेन आफ्नो इज्जत र जीवन बचाउन सफल भएकी हुन् । आफू बोल्न नसक्ने अवस्थामा हुँदाहुँदै पनि उनले बहादुरीपूर्वक ती लुटेराहरुको सामना गरेकी हुन् ।
