प्रतिनिधि सभा र प्रदेश सभा निर्वाचनको पहिलो चरणअन्तर्गत ३२ जिल्लाका ३७ प्रतिनिधि सभा क्षेत्रमा आज मतदान हुँदैछ ।
प्रतिनिधि सभाका ३७ र प्रदेश सभाका ७४ सदस्यका लागि प्रत्यक्षका साथै समानुपातिकमा दलाई मतदान गरिनेछ । गत ३ असोज २०७२ मा जारी भएको संघीयता र गणतन्त्रसहितको संविधान कार्यान्वयन एवं लोकतन्त्रको संस्थागत विकासको पहिलो खुड्किलोको रूपमा यस निर्वाचनलाई लिइएको छ ।
बाह्रखरी समीक्षित सबै पत्रपत्रिकाले आज हुने मतदानलाई महत्त्वपूर्ण स्थान दिएका छन् ।
आजको नयाँ पत्रिका दैनिकले ‘७०२ उमेदवार परीक्षामा, १११ सांसदको निर्वाचन आज’ शीर्षकमा समाचार प्रकाशित गरेको छ ।
नयाँ पत्रिकाले तयार पारेको प्याकेज समाचारमा मतदाता परिचयपत्र नभए के गर्ने ? २१ मंसिरमा बल्ल मतगणना, संविधान कार्यान्वयनको पहिलो खुट्किलो, निर्वाचनपछि ११ वर्षको संक्रमणको अन्त्य, यसरी गरिँदैछ मतपेटिकाको सुरक्षा, तीन घेरामा चुनावी सुरक्षालगायतका उपशीर्षक राखिएको छ ।
नयाँ पत्रिकाले शीर्ष नेताहरू डा. बाबुराम भट्टराई, नारायणकाजी श्रेष्ठ र चीनकाजी श्रेष्ठले गोरखाबाट, योगेश भट्टराई ताप्लेजुङबाट, पशुपतिशमशेर राणा सिन्धुपाल्चोकबाट, बलबहादुर केसी सोलुखुम्बुबाट, जनार्दन शर्मा रुकुमबाट, अर्जुननरसिंह केसी र डा. रामशरण महतले नुवाकोटबाट मतदान गर्ने उल्लेख गर्दै समाचार प्रकाशित गरेको छ ।
गोरखा २ मा भट्टराई र श्रेष्ठ, सिन्धुपाल्चोक १ मा अग्नी सापकोटा र मोहन बस्नेत, नुवाकोट १ मा डा. रामशरण महत र हितबहादुर तामाङ, लमजुङमा देव गुरुङ र दिलबहादुुर घर्ती, सिन्धुपाल्चोक २ मा पशुपतिशमशेर राणा र शेरबहादुर तामाङ, जाजरकोटमा शक्ति बस्नेत र राजीवविक्रम शाह, ओखलढुंगामा रामहरि खतिवडा र यज्ञराज सुनुवार, नुवाकोट २ मा अर्जुननरसिंह केसी र नारायणप्रसाद खतिवडा र गोरखा १ मा चीनकाजी श्रेष्ठ र हरि अधिकारीबीचको प्रतिस्पर्धालाई नयाँ पत्रिकाले रोचक भिडन्त भन्दै समाचार प्रकाशित गरेको छ ।
आजको हिमाल टाइम्सले आज ३२ जिल्लामा मतदान शीर्षकमा मुख्य समाचार प्रकाशित गरेको छ भने निर्वाचन सुरक्षा मजबुत रहेको भन्ने गृह मन्त्रालयले गरेको पत्रकार सम्मेलनको समाचार पनि प्राथमिकताका साथ प्रकाशित गरेको छ ।
नागरिक दैनिकले ‘आज ३२ जिल्लामा मतदान’ शीर्षकमा ब्यानर समाचार प्रकाशित गरेको छ जसमा इन्फोग्राफ पनि समावेश गरिएको छ ।
गृह मन्त्रालयले ढुक्क भएर मत खसाल्न आह्वान गरेको समाचार पनि नागरिकले पहिलो पृष्ठमा प्रकाशित गरेको छ ।
नागरिक दैनिकको पहिलो पृष्ठमा नेपालगन्जबाट कलेन्द्र सेजवालले लेखेको समाचारमा पहिलो चरणमा आज हुन लागेका ५ र ६ नम्बर प्रदेशका केही मतदानस्थल टेलिफोन सम्पर्कसमेत हुन नसक्ने स्थानमा रहेको उल्लेख छ । माथिल्लो डोल्पा, पूर्वी रुकुमलगायतका स्थानमा सञ्चार सम्पर्क नभएको उल्लेख गरिएको छ ।
‘३२ जिल्लामा आज मतदान’ ब्यानर शीर्षक राखेर अन्नपूर्ण पोस्ट दैनिकले ब्यानर नै इन्फोग्राफ राखेको छ । अन्नपूर्णले प्रकाशित गरेको इन्फोग्राफ पूर्ण देखिन्छ जसले आज हुने निर्वाचनका धेरै विषयमा प्रष्ट पारेको छ ।
पोस्टले पहिलो पृष्ठको एक कोलममा मतदातालाई देउताको कसम शीर्षकमा जुम्लाबाट पठाइएको समाचार प्रकाशित गरेको छ भने तीन घेरामा सुरक्षासम्बन्धी समाचार पनि पहिलो पृष्ठमा सानो गरी प्रकाशित गरेको छ ।
‘पहिलो चरणको मतदान आज’ कान्तिपुर दैनिकको ब्यानर हेडलाइन रहेको छ ।
कान्तिपुरमा प्रकाशित समाचारअनुसार सुरक्षाकर्मी टोली १० देखि ३० मिनेटभित्र जुनसुकै स्थानमा पुग्न सक्नेगरी गृह मन्त्रालयले निर्वाचन सुरक्षा प्रबन्ध मिलाएको छ ।
गोरखा पत्र र राजधानी दैनिकले पनि आज हुने निर्वाचनका विषयमा मात्रै पहिलो पृष्ठमा समाचार प्रकाशित गरेका छन् ।
राजधानी दैनिकले पहिलो पृष्ठमा विशेष सम्पादकीय लेखेको छ ।
‘नयाँ गन्तव्यको जग’ शीर्षकमा । यो ऐतिहासिक दिनमा मतदाताको सानो गल्तीले पनि हालसम्मका सबै उपलब्धि गुम्ने खतरा रहन्छ । मतदाताको आजको विवेक भोलिको समृद्ध नेपालको पक्षमा होस् ।’
आज प्रकाशित सबै पत्रिकाले निर्वाचनबाहेक अन्य विषयलाई प्राथिमकता दिएको देखिएन ।
सम्पादकीय
‘मतदाधिकार सदुपयोग गरौँ’ शीर्षकको सम्पादकीयमा कान्तिपुर दैनिकले भनेको छ – यो निर्वाचनबाट संविधान कार्यान्वयनको चरणमा प्रवेश गर्दै छ । निर्वाचनमा मतदान गर्नुअघि अधिकारसमेत रहेकाले निर्वाचनमा मताधिकार प्राप्त सबैले भाग लिऔंँ, विवेक पुर्याएर आफूलाई सही लागेको प्रतिनिधि छानौ ।’
‘जलविद्युत्मा उत्साह’ शीर्षकमा राजधानी दैनिकले सम्पादकीय लेखेको छ ।
बाह्र सय मेगावाटको बूढीगण्डकी जलाशययुक्त विद्युत् आयोजना स्वदेशी लगानीमै निर्माण गर्ने सरकारी निर्णयले ऊर्जा क्षेत्रमा नयाँ उत्साह थपिएको सम्पादकीयमा उल्लेख छ ।
‘मताधिकारको प्रयोगमा नचुकौंँ’ शीर्षकमा गोरखापत्र दैनिकले सम्पादकीय लेखेको छ । सम्पादकीयमा सही लागेको उमेदवार र पार्टीलाई मत दिएरमात्रै आफ्नो र समुदायको हित हुने उल्लेख गरिएको छ ।
‘राजनीतिक कोसेढुंगा’ शीर्षकमा अन्नपूर्ण पोस्टको सम्पादकीयको शीर्षक रहेकोे छ । चुनावी राजनीति विकृत हुँदै गएको यो अवस्थामा योग्य, समाज र राष्ट्रप्रति प्रतिबद्ध नेताको छनोट गर्न मतदाताको विवेकको सही प्रयोग आवश्यक रहेको सम्पादकीयमा उल्लेख छ ।
‘उत्साहले मतदान गरौंँ’ शीर्षकमा हिमालय टाइम्सले सम्पादकीय लेखेको छ ।
‘आफ्नो मत ‘दान’ गर्नुअघि’ शीर्षकमा नयाँ पत्रिकाले सम्पादकीय लेख्दै भनेको छ– मतदान गर्नुअघि आफ्नो मत कसको पक्षमा परिरहेको छ र उसले के सकारात्मक योगदान दिन सक्छ भन्ने विचार पुर्याउनु जरुरी छ ।’