काठमाडौं । केही समयअघि उत्तर कोरियाबाट दक्षिणको सीमा पार गर्न सफल भएका एक सैनिकको अहिले उपचार भइरहेको छ । त्यहाँबाट दक्षिण कोरिया छिर्ने क्रममा उनीमाथि ४० गोली प्रहार गरिएको थियो । चारवटा गोली उनको शरीरका विभिन्न भागमा लागेपछि उनलाई तुरुन्तै दक्षिण कोरियाको अस्पतालमा भर्ना गरिएको थियो ।
तर उनको स्वास्थ्य अवस्था उत्तर कोरियाली सेनाले प्रहार गरेको गोलीले भन्दा पनि अन्य रोगका कारण खराब भएको चिकित्सकहरुले बताएका छन् । २४ वर्षीय ओ छोङ सोङको शरीरलाई जिउँदो राख्न उनलाई दिनकै रगत चढाउनुपरेको अस्पतालका कर्मचारीले बताएका छन् । अहिले भने उनको शरीर भित्र १० इन्च लामो किरा रहेको र उनी हेपटाइटिस बी ले पनि संक्रमित भएको डाक्टर लि कुक जोङले बताएका हुन् ।
गम्भीर घाइते भएका उनी नाजुक अवस्थामा थिए तर चिकित्सकहरुको लगातार कोशिश पछि उनले पुनः नयाँ जीवन पाएको अन्तर्राष्ट्रिय सञ्चारमाध्यमहरुले जनाएका छन् ।
उनको पेटभित्रबाट निकालिएको १० इन्च लामो किरा अस्पतालमा उपस्थित सबैका लागि अत्यन्तै अनौठो घटना रहेको बताइएको छ । उनको उपचार गरिरहेका डाक्टर लिले समेत आफ्नो तीस वर्ष लामो करिअरमा मानिसको पेटभित्र त्यति लामो र भयानक किरा कहिल्यै नदेखेको बताएका छन् । उत्तर कोरियामा सरसफाइको कमी र पोषणयुक्त खाना खान नपाएकोले उनी त्यस्तो हालत्मा पुगेको बताइएको छ ।
गरिबीका कारण उत्तर कोरियाका अधिकांश मानिसको त्यस्तै अवस्था भएको हुन सक्नेबारे, दक्षिण कोरियाका चिकित्सकहरुले चिन्ता व्यक्त गर्दै भनेका हुन् । उत्तर कोरियाली नेता किमले सम्पूर्ण जनता गरिबीका कारण झन्झन् भयानक अवस्थामा पुगिरहेको भएपनि उनी केबल मिसाइल परीक्षण र लडाईँमा मात्र केन्द्रित भइरहेको देखिन्छ । पहिले देखि नै जनता खराब स्थितिमा गुजारा गर्न बाध्य भएका बेलामा खाद्यान्न लगायत दैनिक सामग्रीमाथि पनि प्रतिबन्ध लागेपछि समस्या गम्भीर हुँदै गइरहेको देखिन्छ ।
पहिला भन्दा अहिले ओको स्वास्थ्यमा पनि सुधार भइरहेको बताइएको छ । अस्पतालमा ल्याइएपछि उनमा डिप्रेसनको लक्षण समेत देखा परेको चिकित्सकहरुले जानकारी दिए जसले उनी मानसिक रुपमा समेत अस्वस्थ रहेको पत्ता लागेको छ ।