काठमाडौं । अष्ट्रेलियन कप्तान स्टेभेन स्मिथ आइसीसी टेष्ट क्रिकेटको ब्याटिङतर्फ शीर्ष स्थानमा यथावत रहेका छन् । अन्तर्राष्ट्रिय क्रिकेट काउन्सिल (आईसीसी)ले बिहिबार जारी गरेको टेष्ट ब्याट्सम्यानको नयाँ वरियतामा स्मिथ शिर्ष यथावत रहेका हुन् ।
स्मिथले ९३८ अंक प्राप्त गर्दै शिर्ष स्थानमा रहेका हुन् । इंग्ल्यान्डविरुद्धको एसेज सिरिजमा उलेख्य रन जोड्न नसकेपनि स्मिथले भारतका कप्तान विराट कोहलीलाई ४५ अंकले पछि पारेका छन् ।
आईसीसीले निकालेको नयाँ वरियतामा भारतीय कप्तान विराट कोहली भने पहिलोपटक दोस्रो स्थानमा उक्लिएका छन् । कोहली ८९३ अंक प्राप्त गर्दै शिर्ष दुईमा पुगेका हुन् । यसै साता श्रीलंकाविरुद्धको तीन खेलको टेष्ट सिरिजको दुई खेलमा लगातार दोहोरो शतक बनाएपछि कोहली शिर्ष दुईमा पुगेका हुन् । श्रीलंकाविरुद्ध सिरिजमा कोहलीले ६१० रन बनाएका थिए । उनले इंग्ल्यान्डका जोए रुट र न्युजिल्यान्डका केन विलियम्सनलाई पछि पार्दै दोस्रो स्थानमा उक्लेका हुन् ।
टेष्ट ब्याट्सम्यानको दोस्रो स्थानमा पुगेसँगै कोहली सबै खाले क्रिकेटको नम्बर एक ब्याट्सम्यान बन्ने लक्ष्यमा रहेका छन् । कोहली एकदिवसीय र टि – ट्वान्टी क्रिकेटको ब्याट्सम्यानतर्फ शिर्ष स्थानमा छन् । टेष्ट ब्याट्सम्यानको शिर्ष स्थानमा पुगेका कोहलीले अष्ट्रेलियाका पुर्व कप्तान रिकी पोन्डीङले बनाएको रेकर्ड बराबर गर्ने छन् । उनले सन् २००५ डिसेम्बर देखि २००६ को जनवरीसम्म सबैखाने क्रिकेटको शिर्ष स्थानमा रहेर नयाँ इतिहास बनाएका थिए ।
टेष्ट क्रिकेटको वरियतामा इंग्ल्यान्डका जोए रुट ८७९ अंक जोडेर तेस्रो र भारतका चेतेश्वर पुजारा ८७३ अंकका साथ चौथो स्थानमा रहेका छन् । न्युजिल्यान्डका केन विलियम्सन ८६५ अंकसहित पाँचौं स्थानमा रहेका छन् ।
टेष्ट क्रिकेटकै ब्याट्सम्यानतर्फ अष्ट्रेलियाका डेभिड वार्नर, दक्षिण अफ्रिकाका हासिम अमला, पाकिस्तानका अजहर अली, श्रीलंकाका दिनेश चण्डीमाल र दक्षिण अफ्रिकाकै डीन इल्गर क्रमशः छैटौंदेखि दशौ स्थानमा रहेका छन् ।
टेष्ट क्रिकेटको बलिङतर्फको नयाँ वरियतामा इंग्ल्यान्डका बलर जेम्स एण्डरसन ८९४ अंकसहित शिर्ष स्थानमा रहदा दक्षिण अफ्रिकाका कागीसो राबडा ८७९ अंक सहित दोस्रो स्थानमा छन् । त्यस्तै भारतीय बलर रविन्द्र जडेजा तेस्रो, भारतकै रविचन्द्र आश्विन चौथो र श्रीलंकाका बलर रंगना हेराथ पाँचौ स्थानमा छन् ।
यस्तै टेष्ट बलरतर्फ अष्ट्रेलियाका जोस हाजालवुड, न्युजिल्यान्डका नेल वाग्नर, अष्ट्रेलियाका मिथेल स्टार्क, अष्ट्रेलियाकै नाथन लायन र दक्षिण अफ्रिकाका स्टेन डाले छैटौंबाट क्रमशः दशौं स्थानमा रहेका छन् ।
आईसीसीले जारी गरेको टेष्ट क्रिकेटको अलराउण्डरतर्फ बंगलादेशका शकिब अल हसन शिर्ष स्थानमा यथावत रहेका छन् । यस्तै भारतका रविन्द्र जडेजा दोस्रो, इंग्ल्यान्डका बेन स्टोक तेस्रो भारतकै रविचन्द्र आश्विन चौथो र इंग्ल्याण्डकै मोइन अली पाँचौ स्थानमा रहेका छन् ।