एजेन्सी । स्पेनिस क्लब रियल मड्रिड क्लब विश्वकप फुटबलको फाइनलमा प्रवेश गरेको छ । बुधबार राति भएको दोस्रो सेमिफाइनलमा युएईको अल जाजिरालाई २ – १ ले पराजित गर्दै रियल उपाधि नजिक पुगेको हो ।
युएईमा भएको खेलमा रियलको जितमा क्रिष्टियानो रोनाल्डो र ग्यारेथ बेलले समान एक एक गोल गरे । अल जाजिराका रोमारिन्होले एक गोल फर्काए । अब रियल मड्रिडले उपाधिको लागि ब्राजिलियन क्लब ग्रेमियोको सामना गर्ने छ । ग्रेमियो मेक्सिकोको पचुकालाई हराउदै यसअघि नै फाइनलमा पुगिसकेको छ ।
आबुधाबीमा रियल मड्रिडले अल जाजिराले बनाएको पहिलो हाफको अग्रता उल्टाएर जित निकालेको हो । खेलको ४१ औं मिनेटमा रोमारिन्होले गोल गर्दै अल जाजिरालाई सुरुवाती अग्रता दिलाएका थिए । पहिलो हाफमा १ – ० ले पछि परेको रियल मड्रिडले दोस्रो हाफमा दुई गोल गर्यो ।
दोस्रो हाफको ५३ औं मिनेटमा रोनाल्डोले गोल गर्दै खेल १ – १ को बराबरीमा ल्याए । त्यसअघि रियलका करिम बेन्जिमाले गोल गरेपनि गोलको मान्यता पाएन । बेन्जिमाको हेड गोल भिडियो असिस्टेन्ट रेफ्री प्रविधिले अफसाइड देखाएको थियो । तर, रियलको जितमा नायक बने सब्सिच्युड खेलाडी ग्यारेथ बेल ।
बेन्जिमाको स्थानमा ८१ औं मिनेटमा मैदान प्रवेश गरेका बेलले मैदान छिरेको पहिलो मिनेटमै गोल गरेर रियल मड्रिडलाई २ – १ को अग्रता दिलाए । त्यसपछि दुवै टोलीले थप गोल गर्न सकेनन र रियल मड्रिडको जितमा बेलकै गोल निर्णायक बन्यो ।
