काठमाडौं । टिभिएस एभरेष्ट प्रिमियर लिग (इपिएल) क्रिकेटलाई अन्तर्राष्ट्रिय क्रिकेट परिसद (आइसीसी) ले मान्यता दिएको छ । पुसको पहिलो साताबाट आयोजना हुने इपिएल क्रिकेटलाई बिहीबार आइसीसीले मान्यता दिएको हो ।

आइसीसीले बिहीबार बेलुका इपिएललाई इमेलबाट पत्र लेख्दै प्रतियोगितालाई मान्यता दिएको जनाएको छ । पछिल्लो समय आइसीसीले इपिएल क्रिकेटबारे नेपालमा रहेका सरोकारवालासँग छलफल गर्दै आएको थियो । 

इपिएल क्रिकेटलाई आइसीसीले मान्यता दिएसँगै आइसीसीमा रजिस्टर भएका विदेशी खेलाडीहरुले पनि यो प्रतियोगिता खेल्न पाउने भएका छन् ।  

कीर्तिपुरस्थित टियु क्रिकेट मैदानमा हुने इपीएल क्रिकेटमा काठमाडौं किङ्गस, ललितपुर प्याट्रीयट्स, विराटनगर वारियर्स, भैरहवा ग्लाडीयटर्स, चितवन टाइगर्स र पोखरा राइनोज गरी ६ शहरको सहभागिता रहेको छ ।

इपिएल क्रिकेटको लागि सबै टोलीले अक्सनबाट खेलाडी भित्राईसकेको छ । त्यस्तै अधिकांस क्लबले विदेशी खेलाडी र ट्यालेन्ट हन्टबाट समेत खेलाडी छनोट गरिसकेको छ ।

इपीएल क्रिकेट राउन्ड रोविन लिगका आधारमा संचालन हुनेछ । शीर्ष चार टोली प्लेअफमा पुग्नेछन् । पहिलो प्लेअफमा विजेता हुने टिम फाइनल प्रवेश गर्नेछ । पराजित हुनेले फाइनल प्रवेशका लागि तेस्रो र चौथो टिमबीचको विजेतासँग एलिमिनेटर खेल खेल्नेछ  । इपिएलको विजेताले २१ लाख प्राप्त गर्नेछन् ।