काठमाडौं । चर्चित अभिनेत्री सलमा हायेकले हलिउड निर्माता–निर्देशक हार्वी वाइनस्टीनमाथि यौन उत्पीडनको आरोप लगाएकी छन् । उनले निर्माता–निर्देशक वाइनस्टीनलाई रिशालु राक्षसको संज्ञा दिँदै आफुलाई ज्यान मार्ने धम्कीसमेत दिएको दावी गरेकी छन् । 

रोज मैकगोवन, एञ्जेलीना जोली र ग्वीनेथ पाल्त्रोलगायतका दर्जनौं हलिउड अभिनेत्रीहरुले पनि वाइनस्टीनमाथि यौन उत्पीडनको आरोप लगाइसकेका छन् । यद्यपी हार्वी वाइनस्टीनले बिना सहमतिको शारिरिक सम्बन्धको आरोपको खण्डन गरेका छन् । 

५१ वर्षिया मैक्सिकन मूलकी अमेरीकी अभिनेत्री सलमा हायेकले न्यूयोर्क टाइम्स्मा वाइनस्टीनका साथ काम गर्नु आफ्नो सबैभन्दा ठूलो सपना रहेको बताएकी छन् । 

न्यूड सीनका लागि धम्की

वाइनस्टीनले एक अन्य अभिनेत्रीका साथ न्यूड सीन नदिए फिल्म बन्द गर्ने धम्की समेत दिएको उनले बताएकी छन् । फिल्मको एक दृष्यको छायांकनका क्रममा भएको भावनात्मक उथल पुथल सार्वजनिक गर्दै हायेकले भनेकी छन्, “मलाई औषधी लिनु परेको थियो । जसबाट मेरो भावनाहरु नियन्त्रित त गरियो तर नराम्रोसँग वान्ता आउन सुरु भयो ।’’ उनले उक्त दृष्यको छायांकन गैरजरूरी  भएको पनि दावी गरेकी छन् ।