काठमाडौं । बेलायतका राजकुमार ह्यारीले आफ्नी प्रेमिकासँगको सम्बन्ध र विवाहको खबर सार्वजनिक गरेसँगै यस विषयले विश्वभर चर्चा पाएको थियो । अमेरिकी मूलकी मेगानबारे धेरै कुराहरु राजपरिवारका हिसाबले असामान्य भएकाले पनि यस समाचारले धेरैलाई अचम्मित बनाएको थियो ।
मोडल तथा अभिनेत्रीका रुपमा काम गरिसकेकी डिभोर्सी मेगानलाई राजपरिवारका सबै सदस्यले अपनाउने निर्णय गरिसकेको भएपनि उनको आगमनले राजपरिवारमा धेरै परिवर्तन ल्याउनेबारे सबैले पहिले नै अनुमान गरिसकेका थिए ।
नभन्दै मेगानले यसअघिका राजकुमारीहरुले पालन पालन गर्दै आएका नियमलाई चुनौति दिँदै नयाँ रीति स्थापित गरिरहेकी छन् । वास्तवमा हिजो मात्र बकिङगमको राजदरबारमा मेगानले विवाहअघि नै रानीसँग क्रिस्मस मनाउने र परम्परागत चर्चमा समेत उपस्थित हुने खबर सार्वजानिक गरिएको थियो ।
यस खबरले भिक्टोरियाको अहिलेसम्म चलिआएको परम्परागत मान्यतालाई चुनौति दिँदै राजपरिवारमा आधुनिकतातर्फको बाटो खोलिदिएको छ । लामो समय पछि मात्र राजपरिवारले यसरी नयाँ परिवर्तनलार्ई स्वीकारेको बताइएको छ ।
यसअघि राजकुमारी केटले यस्ता कुनै अवसर पाएकी थिइनन् । तर विवाह हुनु धेरै समय अघि देखि नै मेगानले भने विभिन्न बाहानामा राजपरिवारसँग संलग्नता जनाइरहेकी छन् ।
केही महिनामै राजकुमारीको ताज पहिरने मेगानले एउटा कार्यक्रममा लगाएको पहिरनबारे पनि उत्तिकै चर्चा भइरहेको छ ।
छोटो पहिरनमा आफ्ना केटाकेटी दुवै साथीहरुसँग अत्यन्तै नजिक भएर खिचेको तस्बिर सार्वजानिक भएपछि धेरैले यसमाथि पनि प्रश्न उठाइरहेका छन् ।
अमेरिकामा जन्मेहुर्केकी मेगानको राजदरबारमा यो पहिलो क्रिस्मस हुने बताइएको छ । यसअघि विवाहपूर्व राजकुमारका कुनै प्रेमिकाले पनि राजपरिवारसँग खनपिन गर्ने अनुमति पाएका थिएनन् ।