काठमाडौं । प्रतिनिधिसभामा पाँचवटा मात्रै राष्ट्रिय दल बन्ने सम्भावना देखिएको छ ।
शुक्रबार बिहानसम्मको मतपरिणामअनुसार ५ वटा मात्रै राष्ट्रिय दल बन्ने तर समानुपातिक सिट भने ७ वटासम्मले पाउन सक्ने देखिएको छ । निर्वाचन आयोगका अनुसार १ करोड ५ लाख ८७ हजार ५२१ मत खसेको छ ।
शुक्रबार बिहानसम्म नेकपा एमाले, नेपाली कांग्रेस, माओवादी केन्द्र, संघीय समाजवादी फोरम नेपाल र राष्ट्रिय जनता पार्टीले मात्रै ३ प्रतिशत बढी मत प्राप्त गरेका छन् ।
प्रत्यक्षतर्फ कम्तिमा एक सिट र समानुपातिकतर्फ ३ प्रतिशत बढी मत नल्याउने दलले राष्ट्रिय दलको मान्यता पाउने छैनन् ।
प्रतिनिधिसभामा प्रत्यक्षमा नेकपा एमालेले ८०, माओवादी केन्द्रले ३६, कांग्रेसले २३, राजपाले ११ र फोरम नेपालले १० सिट जितेका छन् । त्यसबाहेक राप्रपा, नयाँ शक्ति, नेमकिपा र स्वतन्त्रले पनि जित हासिल गरेका छन् ।