धनगढी । प्रतिनिधि र प्रदेश सभाको निर्वाचन सम्पन्न भएसँगै प्रदेश नम्बर ७ को राजधानी कहाँ वनाउने भन्ने चर्चा–परिचर्चा सुरु भएको छ । यसअघि सम्भावित राजधानीको रुपमा नाम आएका विभिन्न स्थानहरुलाई प्रदेश नम्बर ७ को राजधानी बनाउनुपर्ने बारेमा बहस भइरहेको छ । निर्वाचित सबै सांसदका प्रदेशको राजधानीबारे आ–आफ्नै अडान छन् ।
तराई क्षेत्रमा पर्ने कैलालीको धनगढी वा अत्तरीया, पहाडको डडेल्धुरा अथवा साविकको सुदूरपश्चिमको क्षेत्रीय सदरमुकाम दिपायललाई राजधानी बनाउने विषयमा बहस थालिएको छ । पहाडी जिल्ला डडेल्धुरा तराई र पहाडी जिल्लाहरुको मध्यविन्दुमा पर्ने भएकोले अबको प्रदेशको राजधानी डडेल्धुरा बनाउनुपर्ने नेपाली कांग्रेसवाट डडेल्धुरामा विजयी प्रदेश सभाका सदस्य कर्ण मल्ल बताउँछन् ।
यसअघि सम्भावित राजधानी रहने स्थानमा डडेल्धुराको नाम थिएन । तर, प्रधानमन्त्री शेरबहादुर देउवा त्यहाँबाट निर्वाचित भएपछि नेपाली कांग्रेसले डडेल्धुरालाई राजधानी बनाउनुपर्ने आवाज उठाइरहेको छ । तर तराईका दुई जिल्लाका नेताहरु यसलाई मान्ने पक्षमा देखिँदैनन् । धनगढी वा अत्तरीया र यसको आसपासको क्षेत्र नै राजधानीका लागि उपयुक्त हुने कैलाली क्षेत्र नम्बर ५ का प्रतिनिधि सभाका सदस्य नारदमुनि राना तर्क गर्छन् ।
प्रतिनिधि र प्रदेश सभाको निर्वाचनअघि नै उमेदवारहरुले राजधानीको मुद्दालाई निर्वाचनको एजेन्डा बनाएका थिए । अहिले त्यसलाई पूरा गर्ने दाउमा पनि विजयी नेताहरु लागिरहेका छन् । नेकपा एमालेले यसअघि नै प्रदेश नम्बर ७ को राजधानी अत्तरीया वनाउने निर्णय गरिसकेको छ । तर सोही पार्टीका नेता प्रेम आलेनगर भने प्रदेशको राजधानी दिपायल हुनुपर्ने बताउँछन् ।
हुन त प्रदेशको राजधानी र प्रदेशको नामाकरण प्रदेश सभाको पहिलो बैठकले गर्ने संवैधानिक व्यवस्था छ । तर पनि दलका नेता–कार्यकर्ता आ आफ्नो पायक पर्ने ठाउँमा प्रादेशिक केन्द्र पार्न शक्ति सञ्चय गर्न थालिसकेका छन् । सबै रुपमा लेखाजोखा गरेर राजधानी तोकिनुपर्ने कैलाली क्षेत्र नम्बर ४ का प्रतिनिधि सभा सदस्य लेखराज भट्टले बताए ।
प्रादेशिक राजधानीका लागि कतिपय ठाउँमा आन्दोलन चलिसकेको छ भने कतिपय ठाउँका प्रभावशाली नेताहरुले भित्रभित्रै मिलाउँदैछन् । संघीय प्रदेशको राजधानी हुनु भनेको त्यस क्षेत्रको विकास, समृृद्धि र व्यापारमा ठूलो फड्को मार्नु भए पनि अब सबैलाई सहज हुने र विकास पनि हुने ठाउँ रोज्नुपर्ने विज्ञहरुको सुझाव छ ।
