काठमाडौं । १ नम्बर प्रदेशको मुख्य मन्त्रीका लागि एमालेभित्र तेस्रो विकल्पका रुपमा राजेन्द्र राईको नाम अघि सारिएको छ ।
पार्टी सचिव तथा प्रदेश इञ्चार्ज भिम आचार्य र पोलिट्ब्युरो सदस्य शेरधन राईले एक अर्कालाई अस्वीकार गर्ने अवस्था सृजना भएपछि तेस्रो विकल्पका रुपमा युवा नेता राजेन्द्र राईको नाम अघि सारिएको हो ।
आचार्यलाई एमाले बरिष्ठ नेता झलनाथ खनालको सहयोग रहेको छ । तर शेरधन राईलाई एमाले अध्यक्ष केपी ओली नजिकका मानिन्छ ।
भिम आचार्य र शेरधन राईले एक अर्काको अस्तित्व अस्वीकार गर्ने अवस्था बनेपछि मध्यमार्गी प्रस्तावका रुपमा राजेन्द्र राईको नाम अघि बढाउन लागिएको एमाले स्रोतले बतायो । उनले पनि विजयी भएपछि आयोजना गरिएको कार्यक्रमहरुमा आफु मुख्य मन्त्रीका लागि योग्य भएको र सफलतापुर्वक जिम्मेवारी सम्हाल्ने अभिव्यक्ति दिँदै आएका थिए ।
दुई कार्यकाल अनेरास्ववियुको अध्यक्ष सम्हालेका राई हाल एमाले केन्द्रिय सदस्य रहेका छन् ।