धनगढी । पीएफए अत्तरीया र फारवेष्ट अत्तरिया स्पोर्टस एकेडेमी धनगढीमा जारी तेश्रो संस्करणको ग्यालेक्सी पव्लिक स्कुल फारवेष्ट पशुपति कप फुटबलको दोस्रो चरणमा प्रवेश गरेका छन्  ।

धनगढी रंगशालामा शुक्रबार भएको दोस्रो खेलमा मनकामना युवा क्लव जुगेडालाई पराजित गर्दै पीएफए अत्तरीया क्वाटरफाईनलमा पुगेको हो । शुक्रबार भएको पहिलो खेलमा अत्तरीयाले मनकामनालाई २–० ले पराजित गरेको हो  । विदेशी खेलाडी सहित मैदान उत्रिएको पिएफएले पहिलो हाफको सुरुवातमै दुई गोल गर्दै जित हात पारेको हो ।

पीएफएका लागि पहिलो हाफको १३ औं मिनेटमा विशाल राईले गोल गर्दै सुरुवाती अग्रता दिलाए । त्यसपछि खेलको २५ औं मिनेटमा अभिषेक रिजालले गोल गर्दै टोलीको अग्रता दोब्बर बनाए । पहिलो हाफमा  २– ० ले अघि रहेको अत्तरियाले दोस्रो हाफमा थप गोल गर्न सकेन । यस्तै मनकामनाले दोस्रो हाफमा सम्हालिएको प्रदर्शन गरेपछि गोल फर्काउन नसक्दा पराजित हुन् पुग्यो ।

यस्तै  फारवेष्ट अत्तरीया स्पोर्टस एकेडेमीले भने विपक्षी टोली अनुपस्थित भएपछि वाई पाएर अन्तिम आठ स्थान बनायो ।  सशस्त्र प्रहरी वल अनुपस्थित भएपछि स्पोर्टस एकेडेमी वाई पाएर दोस्रो चरणमा प्रवेश गरेको हो ।

प्रतियोगिताको विजेताले ३ लाख नगद पुरस्कार प्राप्त गर्ने छन् । त्यस्तै उपविजेताले १ लाख ५० हजार पाउने छन् । प्रतियोगिताको  विभिन्न ५ वटा विधामा उत्कृष्ट हुने खेलाडीले समान १०र१० हजार नगद पुरस्कार पाउने छन् ।