धनगढी । एमाले उपाध्यक्ष भीम रावलले प्रधानमन्त्री शेरबहादुर देउवालाई यथाशीघ्र सरकार छाड्न आग्रह गरेका छन । 

नेकपा एमाले कैलालीले धनगढीमा आयोजना गरेको सम्मान तथा बधाई कार्यक्रममा उनले देउवाले सरकारबाट राजीनामा गर्न ढिलो गरिरहेको बताउँदै तत्काल सरकार छोड्न आग्रह गरेका हुन् । 

“सरकार छोड्न अब ढिलो गर्नु हुँदैन,” उनले भने, “प्रधानमन्त्री देउवाजी सरकार चाँडो छोड्नूहोस्, धनगढीवाट म यही आग्रह गर्न चाहन्छु ।” 

नयाँ जनादेश आइसकेको अवस्थामा सरकार छाड्नुको साटो प्रधानमन्त्रीले नयाँनयाँ निर्णय गर्न खोजेको भन्दै रावलले विरोध गरे । काम चलाउ सरकारले नयाँ निर्णय नगर्न समेत आग्रह गरे । 

नयाँ सरकार निर्माणा र पार्टी एकीकरणको काम सँगसगै अघि बढ्ने बताउँदै रावलले नयाँ सरकार निमार्णको कसरत सुरु भइसकेको बताए ।

माओवादी केन्द्रसँग पार्टी एकिकरण र सरकार निमार्णको काम सँगसँगै अघि बढ्ने बताएका रावलले कांग्रेस नेता कार्यकर्तालाई एकीकरणका बिषयमा अनावश्यक टिप्पणी नगर्न सुझाव दिए । 

सोही कार्यक्रममा बोल्दै माओवादी केन्द्रका नेता लेखराज भट्टले अब माओवादी केन्द्र र एमालेबीचको एकता रोकेर नरोकिने दाबी  गरे । एमाले कैलालीका अध्यक्ष दीर्घ सोडारीको अध्यक्षतामा भएको कार्यक्रममा एमाले र माओवादी केन्द्रबाट विजयी भएका नेताहरूलाई सम्मानपत्र प्रदान गरिएको थियो ।