चितवन । चितवनमा प्रतिनिधिसभा तथा प्रदेशसभाको निर्वाचनमा साना दलका उम्मेदवारहरुको जमानत जफत भएको छ । 

चितवनको तीन प्रतिनिधिसभा र ६ प्रदेशसभा गरी जम्मा ९ क्षेत्रमा प्रत्यक्षतर्फ ९५ जना उम्मेदवार थिए । ९५ उम्मेदवारमध्ये १८ कोमात्रै जमानत जोगिएको छ । ७७ जना उम्मेदवारको जमानत जफत भएको छ । 

सबै साना दलका उम्मेदवारको जमानत जफत भएको मुख्य निर्वाचन अधिकृतको कार्यालयले जनाएको छ । स्वतन्त्र रुपमा उम्मेदवार बनेका सबैको जमानत जफत भएको छ । 

वाम गठबन्धन र लोकतान्त्रिक गठबन्धनका उम्मेदवारबाहेक बाँकी सबैको जमानत जफत भएको हो । क्षेत्र नं १ का निर्वाचन अधिकृत रामेश्वर पराजुलीका अनुसार विजयी उम्मेदवार र निकटतम प्रतिद्वन्द्वीबाहेक सबैको जमानत जफत भएको छ । जमानत जोगाउन सदर मतको १० प्रतिशत मत ल्याउनुपर्ने संवैधानिक व्यवस्था छ । 

चितवन क्षेत्र नं १ मा प्रतिनिधि र प्रदेशसभा गरी ३३ जना उम्मेदवार थिए । ३३ जनामा ६ जनाले मात्र जमानत जोगाएका छन् । २९ जनाको जमानत जफत भएको छ । जमानत जोगाउने भनेका विजयी उम्मेदवार (वाम गठबन्धन) र निकटतम प्रतिद्वन्द्वी नेपाली कांग्रेसका उम्मेदवारमात्रै हुन् । 

चितवनको तीन वटा क्षेत्रमा विवेकशील साझा, नयाँ शक्ति, राजपा, जनमोर्चा, देजमो, नेमकिपा, संघीय समाजवादी, मंगल नेशनल अर्गनाइजेसनलगायतका साना दलको जमानत जफत भएको निर्वाचन अधिकृतको कार्यालयले जनाएको छ । जमानत जफतमा पर्नेहरुमा स्वतन्त्र उम्मेदवार पनि छन् । कुनै पनि स्वतन्त्र उम्मेदवारको एक हजार मत कटेको छैन । 

चितवन क्षेत्र नं २ मा प्रतिनिधि र प्रदेशसभातर्फ ३४ जना उम्मेदवार थिए । यहाँ पनि ६ जनाले जमानत जोगाएका छन् । २८ जनाको जमानत जफत भएको छ ।

प्रतिनिधितर्फ १५ जना, प्रदेश १ मा ९ जना र प्रदेश २ मा १० जना उम्मेदवार थिए ।

क्षेत्र नम्बर २ मा पनि साना दलका उम्मेदवारको नै जमानत जफत भएको छ । सदर मतको १० प्रतिशत मत नल्याउनेहरु २८ जना सबैको जमानत जफत भएको निर्वाचन अधिकृतको कार्यालयले जनाएको छ । 

यसैगरी, चितवन क्षेत्र नं ३ मा पनि २२ जना उम्मेदवारको जमानत जफत भएको छ । क्षेत्र ३ मा २८ जना उम्मेदवार थिए । क्षेत्र नम्बर ३ का निर्वाचन अधिकृत शम्भु रेग्मीका अनुसार यस क्षेत्रमा प्रतिनिधितर्फ १४ जना, प्रदेश ३ (क) मा ७ जना र प्रदेश ३ (ख)मा पनि ७ जना उम्मेदवार थिए । यहाँ पनि साना दल र स्वतन्त्र उम्मेदवारको जमानत जफत भएको छ । 

प्रतिनिधिसभामा प्रत्यक्षतर्फका उम्मेदवारहरुले चितवन क्षेत्र नं १ मा कूल सदर मतको १० प्रतिशत अर्थात् आठ हजार ९००, क्षेत्र नं २ मा ७ हजार र क्षेत्र नं तीनमा ९ हजार ५०० मत कटाउनुपर्ने थियो ।  यस्तै, चितवनका ६ वटै प्रदेशसभामा उम्मेदवारले ४ हजारभन्दा बढी मत ल्याउनु जरूरी थियो ।