काठमाडौं । राष्ट्रिय प्रजातन्त्र पार्टी, नेपालका अध्यक्ष कमल थापाले भर्खरै मात्र सम्पन्न भएको प्रदेशसभा र प्रतिनिधिसभाको निर्वाचनमा पार्टी पराजयको सम्पूर्ण जिम्मेवारी आफूले लिने बताएका छन् ।
प्रदेशसभा र प्रतिनिधिसभाको नजिता सार्वजनिक भइसकेपछि अध्यक्ष थापाले शुक्रबार सामाजिक सञ्जाल ट्वीटरमार्फत आफ्नो धारणा सार्वजनिक गर्दै अध्यक्षको नाताले चुनावमा पराजयको सम्पूर्ण जिम्मेवारी आफूले लिने बताएका हुन् । अध्यक्ष थापाले भनेका छन्, ''अध्यक्षको नाताले चुनावमा पराजयको सम्पूर्ण नैतिक जिम्मेवारी मेरो हो । अलग पहिचान र सुस्पष्ट विचार बोकेको राष्ट्रवादी पार्टीको रुपमा स्थापित राप्रपाको औचित्य, आवश्यकता र महत्व समाप्त भएको छैन र हुँदैन ।''
उनले पार्टी पराजयबाट पार्टीका कार्यकर्ताहरुलाई विचलित नहुन आग्रह गर्दै चुनाव गराएकोमा प्रधानमन्त्री शेरबहादुर देउवालाई धन्यावाद समेत दिएका छन् ।
''कार्यकर्ताहरुलाई कत्तिपनि विचलित नहुन आह्वान,प्रधानमन्त्री देउवालाई धन्यवाद,एमालेलाई बधाई, ''अध्यक्ष थापाले अगाडि भनेका छन् ।
