काठमाडौं । ढाकास्थित नेपाली राजदूतावास र बांगला माउन्टेनरिङ एण्ड ट्रेकिङ क्लबको संयुक्त आयोजनामा शुक्रबार ढाकामा तराई– पहाड–पर्वत विषयक तस्बिर प्रदर्शनी आयोजना गरियो ।
बंगालदेशका लागि नेपाली राजदूत डा चोपलाल भुषाल र त्यहाँका प्रसिद्ध कलाकार कनकचम्पा चक्माले प्रदर्शनीको संयुक्तरुपमा शुभारम्भ गरेको ढाकास्थित नेपाली राजदूतावासले जनाएको छ ।
जलवायु परिवर्तनको जोखिममा रहेको दक्षिण एशियालाई त्यसका नकारात्मक असरबाट जोगाउन सचेतना अभिवृद्धि गर्ने उद्देश्यका साथ आयोजित उक्त प्रदर्शनीमा राजदूत भुषालले प्रकृति माताले दिएका स्रोतसाधन भावी पुस्ताका लागि जोगाउनुपर्नेमा जोड दिएका छन् ।
उक्त दूतावासका अनुसार सगरमाथासहित पाँचवटा उच्च हिमाल आरोहणका क्रममा १३ जना बंगालादेशी पर्वतारोहीले खिचेका तस्बिर प्रदर्शनीमा समावेश गरिएको छ । प्रदर्शनी भोली आइतबारसम्म जारी रहनेछ । रासस