काठमाडौं । एभरेष्ट प्रिमियर लिग (इपिएल) क्रिकेट भोलि (सोमबार) देखि सुरु हुँदैछ । टियु क्रिकेट मैदानमा हुने उद्घाटन खेलमा ललितपुर प्याट्रिएट्सले काठमाडौं किंग्स इलाभेनसँग प्रतिस्पर्धा गर्दैछ ।
प्रतियोगिताको उद्घाटनपछि ११ बजे पहिलो खेल हुनेछ । दुवै टिम जित हात पार्दै सुखद सुरुवात गर्ने दाउमा छन् । ललितपुर प्याट्रिएट्सका कप्तान ज्ञानेन्द्र मल्लले तयारी राम्रो भएको भन्दै प्रतियोगितामा नतिजा पनि राम्रो ल्याउने बताए ।
कप्तान मल्लले भने, “तयारी राम्रै छ । राष्ट्रिय टिम युएई विरुद्धको खेलका लागि निकै व्यस्त भएकोले लामो समय अभ्यास गर्न पाएनौं । तर, चार–पाँच दिनको समयमा राम्रो तयारी गरेका छाैं । हाम्रो सबल पक्ष नै टिम सन्तुलित हो । राम्रो छ काठमाडौं किंग्स तर हामी जितको लागि खेल्नेछौं । प्रतियोगिताको सुरुवात जितसँगै गर्न चाहन्छौं तर सजिलो भने छैन ।”
काठमाडौं किंग्स इलाभेनका कप्तान परवेज महारुफले आफ्नो टिम च्याम्पियन बन्ने दाबी गरे । कप्तान महारुफले भने, “नेपाल पहिलो पटक आएको हुँ, काठमाडौं किंग्स इलाभेनले कप्तानको भूमिका मलाई दिएको छ । टिम निकै बलियो छ । युवा जोस टिममा छ । प्रतियोगिताको उपाधि जित्ने हाम्रो लक्ष्य हो । पहिलो खेलमा नै ललितपुरलाई पराजित गर्दै सुखद सुरुवात गर्नेछाैं ।”
यसैबीच इपिएल क्रिकेटको ट्रफी सार्वजनिक भएको छ । आयोजक इपिएलले काठमाडौंमा आइतबार ट्रफी सार्वजनिक गरेको हो ।
लिगमा ६ वटा क्लबले प्रतिस्पर्धा गर्दैछन् । लिगमा काठमाडौं किंस इलाभेन, ललितपुर पेट्रिएट्स, चितवन टाइगर, विराटनगर वारियर्स, पोखरा राइनोज र भैरहवा ग्लाडिएटर्स रहेका छन् ।
इपिएल क्रिकेट राउन्ड रोविन लिगका आधारमा हुनेछ । शीर्ष चार टोली प्लेअफमा पुग्नेछन् । पहिलो प्लेअफमा विजेता हुने टिम फाइनल प्रवेश गर्नेछ । पराजित हुनेले फाइनल प्रवेशका लागि तेस्रो र चौथो टिमबीचको विजेतासँग एलिमिनेटर खेल खेल्नेछ । इपिएलको विजेताले २१ लाख पुरस्कार प्राप्त गर्नेछ ।
