काठमाडौं । आगामी बिहीबारबाट सुरु हुने दोस्रो संस्करणको अन्तर्राष्ट्रिय ब्याडमिन्टन सेरिजको तयारी पुरा भएको छ ।  नेपाल ब्याडमिन्टन संघले एक प्रेस विज्ञप्ति जारी गर्दै सेरिजको सम्पूर्ण तयारी पुरा भएको जनाएको हो ।

त्रिपुरेश्वरस्थित दशरथ रङ्गशालाको कभर्डहलमा पुस ५ गते देखि ९ गते सम्म आयोजना हुने प्रतियोगिताको केहि कार्यबाहेक सबै तयारी पुरा भएको संघले जनाएको हो  । संघका महासचिव विरेन्द्र श्रेष्ठले जारी गरेको विज्ञप्तिमा भनिएको छ, “हामीले प्रतियोगिताको लागि आवश्यक करिव सम्पूर्ण तयारी पुरा गरि सकेका छौं । अव छिटपुट कामहरु बाँकी छ त्यसलाई पनि समयमै पुरा गर्दछौं ।“

नेपालले अघिल्लो बर्ष आयोजना गरेको अन्तराष्ट्रिय सिरिज सफलतापूर्वक सम्पन्न गरेकाले यस बर्ष पनि नेपाललाई विश्व ब्याडमिन्टन महासंघ र एशियाली ब्याडमिन्टन महासंघले नेपालमा अन्तराष्ट्रिय प्रतियोगिता आयोजना गर्न स्विकृती प्रदान गरेको हो । संघले नेपाली ब्याडमिन्टन खेलाडीहरुको स्तरबृद्धि गर्ने अभियान स्वरुप यो सेरिजलाई आफ्नो क्यालेन्डरमा समेत राखेको छ ।

सेरिजमा दक्षिण एशियाका नेपालसहित भारत, पाकिस्तान, बंगलादेश, माल्दिभ्स र भुटानले सहभागिता जनाउने छ । त्यस्तै   ओसियानाबाट अष्ट्रेलिया र उत्तर अमेरिकाबाट चिलीले समेत सहभागिता जनाउने छ ।