मनिला । दक्षिणी फिलिपिन्समा हवाई र स्थलमार्गबाट भएको सुरक्षा कारबाहीका क्रममा कम्तीमा पाँच मुस्लिम विद्रोहीको मृत्यु भएको छ । सधैंजसो अशान्त भइरहने सो क्षेत्रमा इस्लामिक स्टेट्सका आतङ्ककारीसँग आबद्ध मुस्लिम विद्रोही मारिएका छन् । सोही कारबाहीका क्रममा एक सैनिकको पनि मृत्यु भएको बताइएको छ ।
गत शनिबार मिन्दानाओ द्वीपमा करिब ५० जनाको समूहमा आएका आतङ्ककारीहरूले पाँच घण्टासम्म आक्रमण गरेका र त्यसको जवाफी कारबाहीमा पाँच आइएस आतङ्ककारी मारिएका हुन् ।
यस क्रममा एक सैनिक अधिकारीले पनि ज्यान गुमाएको क्षेत्रीय सैनिक प्रवक्ता एर्भिन इन्सिनास्ले बताएका छन् । एक सैनिक र इस्लामिक स्टेट्स आतङ्ककारी समूहसँग आबद्ध बाङ्गसामोरा इस्लामिक फ्रिडमका पाँचजना लडाकू मारिएका समाचारमा जनाइएको छ ।
मुस्लिम समुदायको बलियो प्रभाव रहेको यस द्वीपमा दशकौँदेखि जारी हत्या हिंसामा एक लाखभन्दा बढी व्यक्तिले ज्यान गुमाएका छन् । रासस/एएफपी