धनगढी । सशत्र प्रहरीको एपीएफ क्लब धनगढीमा जारी नेपाल आईस सुदुरपश्चिम खप्तड गोल्डकपको फाइनलमा पुगेको छ । आइतबार भएको दोस्रो सेमिफाइनलमा आयोजक सिजी सुदूरपश्चिम ११ लाई २ – ० ले पराजित गर्दै एपीएफ फाइनलमा प्रवेश गरेको हो ।
धनगढी रंगशालामा भएको खेलमा एपीएफलाई जित दिलाउन अन्जन बिष्ट र नविन लामाले एक एक गोल गरे । अब एपीएफले सोमबार हुने फाइनलमा अर्को विभागीय टोली त्रिभुवन आर्मीसँग खेल्ने छ । आर्मी क्लब शनिबार भएको पहिलो सेमिफाइनलमा मनाङ मर्स्याङ्दी क्लबलाई ३ – १ ले पराजित गर्दै फाइनलमा पुगिसकेको छ ।
प्रतिस्प्रधात्मक बनेको खेलको पहिलो हाफ गोलरहित बराबरीमा सकिएको थियो । दोस्रो हाफमा एपीएफले दुई गोल गर्दै फाइनलमा आर्मीसंगको भेट पक्का गर्यो । घरेलु दर्शकको साथ मैदान उत्रेको सुदूरपश्चिमविरुद्ध खेलको ५७ औं मिनेटमा अन्जनले गोल गर्दै एपीएफलाई सुरुवाती अग्रता दिलाए । तर, युवराज खड्काले टचलाईनबाट ल्याएर उपलब्ध गराएको अन्जनको गोल विवादास्पद बनेको थियो । जसको कारण खेल ८ मिनेट रोकिएको थियो । खड्काले आउट भईसकेको बल ल्याएको भन्दै सुदूरपश्चिमका खेलाडीले आपत्ति जनाएका थिए । तर, लाइन्सम्यानले उक्त बललाई आउट दिएन् ।
एपीएफविरुद्ध पहिलो हाफमा आक्रामक खेल खेलको आयोजक सुदूरपश्चिम पहिलो गोल खाएपछि भने दबाबमा खेलेको थियो । जसको फाइदा एपीएफले उठायो । त्यसपछि खेलको ७७ औं मिनेटमा म्यान अफ दि म्याच बनेका नबिनले गोल गर्दै एपीएफलाई २ – ० को जित दिलाए । त्यसअघि सुदूरपश्चिमले केहि गोलको अवसर खेर फालेको थियो भने एपीएफका नबिन र श्याम नेपालीले किपर मात्र रहेको बेला गोल गर्न सकेनन् ।
जितपछि एपीएफका प्रशिक्षक रत्नकाजी महर्जनले दोस्रो हाफमा खेल सुधार गर्दा जित निकाल्न सहज भएको बताए । यस्तै उनले फाइनल प्रतिद्वन्द्वी आर्मी कठिन टोली भएपनि उपाधि जित्ने लक्ष्यसहित मैदान उत्रने बताए । यता, सुदूरपश्चिमका प्रशिक्षक ललित चन्दले रेफ्रीले आफ्नो टोलीलाई सहयोग नगर्दा पराजित भएको बताए । उनले आफ्नो टोलीको मिडफिल्डर जिको घाइते हुनु र उपयुक्त अभ्यास गर्न नपाएकोले पराजित भएको बताए ।
प्रतियोगिताको विजेताले ११ लाख ११ हजार १ सय ११, उपविजेताले ५ लाख ५५ हजार ५ सय ५५ प्राप्त गर्नेछन् । यस्तै विभिन्न विधाका उत्कृष्ट खेलाडील समान १५–१५ हजार पाउँदा उत्कृष्ट एक खेलाडीले यमाहा मोटरसाईकल पुरस्कार पाउनेछन् ।