काठमाडौं । नेपाली कांग्रेसका नेताहरुले सभापति शेरबहादुर देउवालाई संसदीय बोर्ड र कार्यसम्पादन समिति खारेज गर्न दबाब दिएका छन् ।

प्रधानमन्त्री निवास बालुवाटारमा सोमबार भएको बैठकमा रामचन्द्र पौडेल पक्षधरले तत्काल विधानविपरित रहेका दुई समिति खारेज गर्न माग गरेका थिए ।

नेता पौडेलका अनुसार विधानविपरीत गठन भएका संसदीय बोर्ड र कार्य सम्पादन समिति विघटनको माग गरिएको थियो । कांग्रेसको विधानमा संसदीय समिति बढीमा १४ सदस्यीय रहने उल्लेख भए पनि २४ जना र कार्यसम्पादन समितिमा बढीमा २२ जना रहनुपर्ने भए पनि २९ जना रहेका छन् ।

तर बैठक स्रोतका अनुसार सभापति देउवाले यसको दोष पौडेल र महामन्त्री सशांक कोइरालालाई दिएका थिए । उनीहरुले नाम बढी दिएका कारण ठुलो समिति बनाउनुपरेको प्रष्ट पारेका थिए ।