काठमाडौं । च्याम्पियनसिप अन्तर्गत १४ औं राष्ट्रिय तेक्वान्दो प्रतियोगितामा त्रिभुवन आर्मी क्लब टिम च्याम्पियन बनेको छ । शनिबार सम्पन्न च्याम्पियनसिपमा आर्मीले सर्वा्धिक ९ स्वर्ण जितेको छ ।
सातदोबाटोस्थित नेपाल तेक्वान्दो एकेडेमीमा भएको प्रतियोगितामा आर्मीले गेरोगीतर्फ ७ स्वर्ण, ५ रजत र ३ कांस्य जित्यो भने पुम्सेमा २ स्वर्ण, २ रजत र १ कांस्य हात पारेको छ । दोस्रो स्थानमा रहेको नेपाल पुलिस क्लबले गेरोगीमा ६ स्वर्ण, ४ रजत र ३ कांस्य जित्यो । पुम्सेमा पुलिसले २ स्वर्ण, १ रजत र २ कांस्य प्राप्त गर्यो ।
च्याम्पियनसिपमा नेपाल एपीएफ क्लबले तेश्रो स्थानमा चित्त बुझायो । गेरोगीमा २ स्वर्ण, ३ रजत र ३ कांस्य जितेको एपीएफले पुम्सेमा १ स्वर्ण र २ कांस्य हासिल गर्यो । विभागीय टिम बाहेक गेरोगी र पुम्सेमा मध्यमाञ्चल र पूर्वाञ्चलका १–१ खेलाडीले स्वर्ण जिते । गेरोगीको पुरुष ८७ केजीमा मध्यमाञ्चलका भुपेन श्रेष्ठ र महिला पुम्सेको २० वर्षमुनि पूर्वाञ्चलकी सिना मादेनले स्वर्ण हात पारे ।
प्रतियोगिताको गेरोगीतर्फ पुरुषमा १२ औं सागका रजतधारी पुलिसका वीरबहादुर महरा तथा महिलामा एपीएफकी अस्मिता खड्का उत्कृष्ट खेलाडी चुनिए । वीरबहादुरले ६३ केजीमुनि स्वर्ण जितेका थिए । अस्मिताले ४९ केजीमुनि स्वर्ण हात पारिन । पुम्सेको पुरुष्मा एपीएफका नवीन श्रेष्ठ तथा महिलामा आर्मीकी निता गुरुङ उत्कृष्ट ठहरिए । नवीनले १६ वर्षमुनि र निताले २० वर्षमाथि स्पर्धामा स्वर्ण चुमे । उत्कृष्ट चारैले जनही ५ हजारका दरले नगद पुरस्कार पाए ।
अन्तिम दिन महिला ४९ केजीमुनि बाहेक अन्य चार स्पर्धाको फाइनल भएको थियो । महिलाको ५३ केजीमुनि १२ औं सागकी रजत विजेता निमा गुरुङले पहिलो स्थान हात पारिन् । निमाले फाइनलमा पूर्वाञ्चलकी सन्ध्याकुमारी सिंहलाई हराइन् । ४६ केजीमुनि आर्मीकी कल्पना चौधरीले स्वर्ण जितिन् । कल्पनाले प्रतियोगिताकै अन्तिम फाइनलमा पश्चिमाञ्चलकी सरिता श्रेष्ठलाई २९–२३ ले पाखा लगाइन् । दोश्रो राउन्डको खेल समाप्तिसम्म दुवै २१–२१ को समान स्थितिमा थिए । तेश्रो राउन्डमा कल्पनाले ८–२ को अग्रता बनाउदै स्वर्ण पक्का गरिन् । पहिलो राउन्डमा कल्पना १३–७ ले अघि थिइन् भने दोश्रोमा ८–१४ ले पछि परेकी थिइन् ।
पुरुष ५८ केजीमुनि आर्मीका सागर गुभाजु र ५४ केजीमुनि प्रहरीका अनोज मल्ल पहिलो भए । फाइनलमा सागरले मध्यमाञ्चलका कपिल थापा र अनोजले एपीएफका चन्द्र राणा मगरको चुनौती पन्छाएका थिए ।
प्रतियोगितामा ५ विकास क्षेत्र र ३ विभागीय टोलीका १ सय ७६ खेलाडीले गेरोगीमा १६ र पुम्सेमा ६ गरी विभिन्न २२ स्पर्धामा प्रतिस्पर्धा गरेको नेपाल तेक्वान्दो संघले जनाएको छ ।