काठमाडौं । भारतको सुप्रीम कोर्टले विवादित फिल्म ‘पद्मावत’ लाई चार राज्यमा लगाइएको रोक हटाउन आदेश दिएको छ । कोर्टको निर्णयपछि यो फिल्मलाई लिएर जारी विरोध झनै तीव्र बनेको छ ।
२५ जनवरीमा रिलीज हुने भनिएको फिल्मको विरोधमा बिहारको मुजफ्फरपुरमा राजपूत करणी सेनाका सदस्यहरुले उत्पात मच्चाएका छन् । बिहार प्रहरीका अनुसार ज्योति कार्निवल सिनेमा हलमा आफुलाई करणी सेना बताउने ३०–४० जनाले हुलदंगा गरेका छन् ।
उनीहरुले सिनेमा हलको बाहिरी पर्खालमा लगाइएका ‘पद्मावत’ फिल्मका पोस्टरहरु च्यात्नुका साथै फर्निचर तोडफोड गरेका छन् ।
करणी सेनाका समर्थकहरुले ‘पद्मावत’ प्रदर्शन गर्ने सिनेमा हलहरुमा आगो लगाउने धम्की दिएका छन् । ‘‘हामी कुनै पनि हालतमा सिनेमा घरहरुमा यो फिल्म चल्न दिँदैनौं,’’ उनीहरुले भनेका छन् ।