यमन । यमनको बन्दरगाह सहर एडेनमा दक्षिणी यमनका पृथकतावादीहरूले एडेन सहरका सरकारी भवनहरू पनि कब्जा गरेको पछिल्लो समाचार प्राप्त भएको छ । यहाँको सरकारी फौजसँग उनीहरुले व्यापक रुपमा झडप गरिरहेका छन् । आइतबार राति नै उनीहरूले ती भवनहरू कब्जा गरेका समाचारमा जनाइएको छ । 

सरकारी सेना र दक्षिणी सङ्क्रमणकालीन परिषद् सम्बद्ध शक्तिबीच आइतबार ब्यापक मात्रामा झडप भएको थियो । त्यसमा परी दुवैपक्षका गरी कैयौँ नागरिकको मृत्यु भएको छ । तर मृत्यु हुनेको सङ्ख्या के कति हो भन्ने बारेमा भने केही बताइएको छैन । 

वर्तमान यमनी सरकारले साउदी अरबको समर्थन प्राप्त गरेको छ । एडेनमा रहेको सहयोगी समूह र विद्रोहीबीच भएका झडपमा आम सर्वसाधारणले भने दुःख पाएका बताइएको छ । 

प्रधानमन्त्री अहमद बिन डागरले एडेनमा पृथकतावादीहरूले सत्ता हातमा लिन खोजेको बताउनुभएको छ । उनका अनुसार पृथकतावादीहरुले सरकारी भवन कब्जा गर्नुका साथै सर्वसाधारणलाई ढाल बनाउन खोजेको पनि आरोप लगाएका छन् ।  

हादी सरकारको अस्थायी आधार क्षेत्रको रूपमा बन्दरगाह सहर एडेन रहेको छ । हुथी विद्रोहीहरूले राजधानी सानामा पनि नियन्त्रण कायम गरेका समाचार यसअघि नै आएको थियो । 

वर्तमान यमन देश सन् १९९० मा बनेको हो । त्यस समयमा उत्तरी र दक्षिणी यमन मिलेर वर्तमान यमन बनेको हो । तर पृथकतावादीहरूले दक्षिणी यमनलाई स्वतन्त्र होस् भन्ने चाहेका बताइन्छ । 

यमनको बन्दरगाह सहर एडेनमा भएको यो पछिल्लो हिंसाले उक्त नगरमा यसअघि देखि नै कायम रहेको पाइएको खराब मानवीय अवस्थामा पुनः ह्रास आएको छ । 

उक्त नगरमा विद्रोहीले ‘शान्तिपूर्ण प्रदर्शन’ आह्वान गरेको गरेको थियो । तर सरकारले भने त्यसमा रोक लगाउन कडा निर्देशन दिएको थियो । 

उक्त निर्देशन पालना नगरेपछि साउदी अरब गठबन्धन अन्तर्गतको सरकारी सेना र विद्रोहीबीच सुरुमा उक्त क्षेत्रमा झडप भएका हो । 

झडपबाट सुरु भएको विद्रोहीहरुको हिंसा घण्टौँ लामो समयसम्म शसस्त्र कारबाहीपछि सैन्य शिवीरलाई नै विद्रोही लडाकूले कब्जा गरेको प्रत्यक्षदर्शीले बताएका छन् । 

दुबै पक्षका सयौँ सेना उपचारका लागि अस्पताल पुर्याइएको अस्पताल स्रोतले जनाएको छ । साउदी नेतृत्वको सेनाले घटनास्थलमाथि हवाई सेनालाई पठाएको तर सेनाले हवाई आक्रमण भने नगरेको स्थानीयले बताएका छन् । 

यस दक्षिणी बन्दरगाह सहरलाई सन् २०१५ देखि यमनको अस्थायी राजधानीका रूपमा यमन सरकारले सञ्चालन गर्दै आएको स्थान हो । 

दक्षिण यमन स्वतन्त्र होस् भन्ने चाहने पृथकतावादी र साउदी समर्थित सरकारका फौजहरू बीचको उक्त लडाईंमा एडेनमा कम्तीमा पनि १० जना मारिएका छन् भने अन्य कैयौँ घाइते भएका छन् । 

सोमबार बिहानबाट भने सरकार र पृथकतावादी नेतृत्वले आफ्ना फौजहरूलाई झडप रोक्न आदेश दिएका छन् । त्यसयता भने हिंसा कम भएका खबरहरू आएका छन् ।रासस÷सिन्ह्वा