काठमाडौं । अमेरिकी राष्ट्रपति डोनाल्ड ट्रम्प र भारतीय प्रधानमन्त्री नरेन्द्र मोदीले मालदिभ्सको पछिल्लो राजनीतिक अवस्थाप्रति चिन्ता प्रकट गरेका छन् । अमेयिरकी राष्ट्रपति ट्रम्प र भारतीय प्रधानमन्त्री मोदीले टेलिफोन कुराकानीका क्रममा मालदिभ्समा लगाइएको सं्रकटकालप्रति चिन्ता प्रकट गरेका हुन् । ह्वाइट हाउसले दुई जनाबीचको कुराकानीका क्रममा अफगानिस्तानको स्थिति र एशिया प्यासिफिकमा सुरक्षा बढाउने विषयमा पछि छलफल भएको जनाएको छ । 

सन् २०१८ मा ट्रम्प र मोदीबीच पहिलो पटक टेलिफोनमा कुराकानी भएको बताइएको छ । 

टेलिफोन कुराकानीका बारेमा जानकारी दिँदै ह्वाइट हाउसले भनेको छ, ‘‘दुबै नेताहरुबीच मालदिभ्सको राजनीतिक संकटमाथि चिन्ता व्यक्त भएको छ । लोकतन्त्र र कानूनी शासनको सम्मान गर्नेमा दुबै नेताले जोड दिएका छन् ।’’ 

ह्वाइट हाउसले ट्रम्प र मोदीबीच एशिया प्यासिफिकमा सुरक्षा र समृद्धि बढाउने विषयमा पनि कुराकानी भएको जनाएको छ । दुवै जनाले म्यान्मार र रोहिंग्या शरणार्थीको समस्या समाधानका विषयमा पनि छलफल भएको बताइएको छ । 

के हो मालदिभ्सको समस्या

मालदिभ्सको सर्वोच्च अदालतले गत बिहीबार विपक्षी दलका नौ जना उच्च नेताहरुलाई रिहाई गर्न सरकारलाई आदेश दिएको थियो । साथै अदालतले उनीहरु विरुद्ध चलाइएको मुद्दा राजनीतिबाट प्रेरित भएको पनि बताएको थियो । 

अदालतको उक्त फैसलापछि त्यहाँको राजनीतिमा संकट उत्पन्न भएको छ । अदालतको फैसलापछि मालदिभ्सका राष्ट्रपति अब्दुल्ला यामीनले आदेश अस्वीकार गरेका थिए । अदालतको आदेश नमान्ने बताएपछि देशैभर सुरु भएको प्रदर्शनलाई मध्यनजर गर्दै राष्ट्रपति यामीनले १५ दिनका लागि संकटकालको घोषणा गरेका छन् । 

संकटकालपछि त्यहाँको सरकारले सर्वोच्चका प्रधान न्यायधिश अब्दुल्ला सईद र अली हमीद समेत गरी दुई न्यायाधिशलाई गिरप्mतार गरेर जेल चलान गरेको छ ।