काठमाडौं । फेसबुकले हालै गरेको एक सर्वेक्षणमा फेसबुकका युवा प्रयोगकर्ताहरु घट्दै गइरहेको र बढी उमेरका प्रयोगकर्ताको सङ्ख्यामा भने वृद्धि हुँदै गएको पाइएको छ । अन्तर्राष्ट्रिय सञ्चार माध्यमका अनुसार गतवर्ष मात्र १० प्रतिशत भन्दा बढी युवाहरुले फेसबुक नचलाएको अनुसन्धानमा देखिएको थियो ।
यसरी युवाहरुमाझ फेसबुकको मोह घट्नुका पछाडि थुप्रै कारण हुन सक्ने फेसबुकको आधिकारिक टोलीले बताएको छ । आजभोलिका युवाहरुलाई फेसबुक ‘कुल’ लाग्न छाडेकाले उनीहरु ‘इन्स्टाग्राम’ र ‘स्न्यापच्याट’ जस्ता फोटो शेयरिङ एपप्रति बढी केन्द्रित भइरहेको पाइन थालेको बताइएको छ । अहिले २०१८ को सुरुवातमा समेत फेसबुकले युवाहरु माझ कुनै ठूलो उपलब्धि हासिल गर्न नसकेको फेसबुकले बताएको छ ।
त्यस्तै उता ५५ वर्ष भन्दा माथिको उमेरसमूहमा भने फेसबुकको लोकप्रियता बढ्दै गइरहेको बताइएको छ । गत वर्षपनि फेसबुकका नयाँ प्रयोगकर्ताहरुमा ५० वर्ष भन्दा बढी उमेरका मानिसको सङ्ख्या अधिक रहेको पाइएको बताइएको छ ।
पछिल्लो महिना मात्र फेसबुकका प्रमुख कार्यकारी अधिकृतले न्युजफिडमा ठूलो बदलाव ल्याएर फेसबुकको गुणस्तर वृद्धि गराउने फैसला गरेका थिए । तरपनि फेसबुक चलाएको लामो समय बितिसकेकाले प्राय युवा प्रयोगकर्ताहरु नयाँ कुराको खोजीमा इन्स्टाग्राम र स्न्यापच्याटप्रति बढी आकर्षित भइरहेको अनुसन्धानबाट पत्ता लगाइएको हो ।
