नेकपा (एमाले)का अध्यक्ष केपी शर्मा ओली नेपालको ४१ औं प्रधानमन्त्री नियुक्त भएको समाचार आजका सबै दैनिकले ब्यानर हेडलाइन बनाएर छापेका छन् । ओली प्रधानमन्त्री भएसँगै निवर्तमान प्रधानमन्त्री नेपाली कांग्रेसका सभापति शेरबहादुर देउवालाई केही दैनिक पत्रिकाले उनले गराएको निर्वाचनका लागि स्याबासी पनि दिएका छन् ।
सबै पत्रिकामा हिजो बिहानैदेखिका घटनाक्रमले स्थान पाएका छन् । अन्नपूर्ण पोस्टले ओली तथा देउवाको दिनभर लुकामारी भएको खबरलाई महत्त्व दिएर प्रकाशित गरेको छ ।
ओलीले राष्ट्रपतिलाई आफूलाई कम्युनिस्ट गठबन्धनको पूर्ण समर्थन भएको पत्र हस्तान्तरण गर्दागर्दै प्रधानमन्त्री देउवाले आफूले सो पदबाट राजीनामा दिन तयारी गरेकाले राजीनामाको घोषणा नभईकन उताको कार्यक्रम अघि नबढाउन आग्रह गरेका थिए । त्यसपछि एमाले अध्यक्ष ओलीसहित पूर्वसभामुख सुवास नेम्वाङ देउवालाई कुरेर बसेका थिए ।
केहीबेरमा देउवा आएर एमाले नेतासँग नभेटी राष्ट्रपतिलाई राजीनामा बुझाएर गए । देउवा गएलगत्तै राष्ट्रपतिले ओलीसहित अरू एमाले नेता बसेको कोठामा गएर प्रधानमन्त्री नियुक्त भएको पत्र हस्तान्तरण गरिन् । तर, सो पत्रमा मिति भने एक वर्ष अघिको लेखिएको बाहिर आएपछि निकै आलोचना भएको थियो । पत्र पाएर राष्ट्रपति कार्यालयबाट एमाले कार्यालयमा आएपछि मात्र ओली एमालेको संसदीय दलको नेताका रूपमा चुनिएका थिए । तर, संविधानले संसदीय दलको नेता नै चाहिन्छ नभनेकाले ओलीको नियुक्तिमा संवैधानिक अड्चन भने देखिएन ।
अन्नपूर्ण पोस्टले ओलीको शपथ ग्रहण सकिएपछि निवर्तमान शेरबहादुर देउवाले ओलीलाई कुर्सी छाड्नुपर्नेमा केही अलमल भएको पनि लेखेको छ । ओलीले पहिलो मन्त्रीका रूपमा कसलाई शपथ गराउँछन् भन्ने अड्कलबाजी भइरहेको अवस्थामा सबैलाई चकित पार्दै उनले लालबाबु पण्डित तथा थममाया थापालाई मन्त्रीको शपथ गराएका थिए ।
पोस्टले नै माओवादीले मन्त्रिपरिषद्मा कसैलाई पनि समावेश नगराएकाले पहिलो गाँसमा नै ढुंगा भन्ने शीर्षकमा सानो बक्स समाचार पनि प्रकाशित गरेको छ । यो समाचारलाई कान्तिपुरले ‘एकता नटुंगिई माओवादी नजाने’ शीर्षकमा सानो समाचार बनाएको छ भने राजधानीले ‘एकता सहमतिपछि माओवादी सरकारमा’ शीर्षकमा एन्कर बनाएको छ । हिमालय टाइम्सले पनि ‘किन छुट्यो माओवादी’ शीर्षकमा रंगीन बक्स बनाएको छ ।
पाँच घोषणा
कान्तिपुरले प्रधानमन्त्री ओलीको ६७ वर्ष अघिको जन्मदेखि अहिलेसम्मका मुख्य मुख्य उपलब्धिको समय चित्रमाला उनको तस्बिर वरिपरि बनाएको छ । साथै कान्तिपुरले पदभार ग्रहणलगत्तैका पाँच घोषणालाई महत्त्व दिएको छ । ओलीले संविधान कार्यान्वयनका लागि राज्य संयन्त्रलाई सबल, सक्षम र जनमुखी बनाउने बताउँदै संघीय, प्रदेश र स्थानीय सरकारलाई प्रभावकारी बनाई कानुनी व्यवस्था, प्रशासनिक पुनःसंरचना र जनशक्ति परिचालन तथा क्षमता विकास गर्ने योजना पनि सुनाए ।
नयाँ पत्रिकाले ओलीको पहिलो निर्णय ‘प्रत्येक स्थानीय तहमा उद्योगग्राम’ भन्ने समाचार प्रकाशित गरेको छ ।
चुनाव गराउन सफल, वित्तीय अनुशासनमा असफल
नागरिक दैनिकमा बालकृष्ण अधिकारीले लेखेको टिप्पणीमा प्रधानमन्त्री देउवाको चौथो कार्यकाल निर्वाचन गराउन सफल भएकोमा प्रशंसा गरेको छ । नयाँ पत्रिकाले पनि देउवाको चौथो कार्यकाल निर्वाचनमा सफल भएको तर सुशासनमा विफल भएको समाचार बनाएको छ ।
सम्पादकीय
आज समीक्षित सात पत्रिकामध्ये अन्नपूर्ण पोस्टबाहेक अन्य सबैले ओलीको कार्यकालमा चुनौती र अवसरका बारेमा सम्पादकीय लेखेको छ । हिमालय टाइम्सले संघीय शासन व्यवस्थाको सफलता/असफलता संघीय सरकारको कार्यशैलीमा भर पर्ने जनाएको छ ।
साथै संघीय शासन प्रणालीमा आर्थिक व्यवस्थापन निकै चुनौतीपूर्ण हुने र तीनवटा तहको प्रशासनिक खर्च पनि चुनौतीपूर्ण हुने अनुमान टाइम्सले गरेको छ ।
कान्तिपुरले नवनियुक्त प्रधानमन्त्री ओलीको कार्य सञ्चालनको परीक्षा मन्त्री, सल्लाहकार, सहयोगी नियुक्तिसँगै सुरु हुन्छ । सर्वसाधारण नागरिकमा सुशासन, विकास निर्माण र आर्थिक समृद्धिको तीव्र आकांक्षा छ भन्दै कान्तिपुर लेख्छ — यसैको विश्वासमा वाम गठबन्धन सरकारमा पुग्न सकेको हो । राजधानीले ओलीको पूर्ण सफलताको कामना गरेको छ भने नयाँ पत्रिकाले ओलीलाई बधाई दिएको छ ।
गोरखापत्र तथा नागरिकले ओलीको अवसर र चुनौतीको विषयमा सम्पादकीय लेखेका छन् । अन्नपूर्ण पोस्टले क्रिकेटमा भएको सफलताको विषयमा सम्पादकीय लेखेको छ ।