काठमाडौं । सर्वाधिक पुरस्कार राशिको धनगढी प्रिमियर लिग (डीपीएल) क्रिकेटको अफिसियल एयरलाइन्स पाटनरको रुपमा श्री एयरलाइन्स रहने भएको छ । काठमाडौंमा आइतबार श्री एयरलाइन्स र डीपीएलबीच सम्झौता भएको हो ।
सम्झौताअनुसार श्री एयरलाइन्सले डीपीएललाई करिब १० लाखबराबरको प्रायोजन गर्ने भएको छ । ७ लाख ५० हजार नगद र थप विभिन्न सेवामा गरी करिब १० लाख बराबरको सम्झौता भएको पत्रकार सम्मेलनमा डीपीएलका निर्देशक सुवास शाहीले बताए ।
सम्झौतापत्रमा हस्ताक्षर गर्दै श्री एयरलाइन्सका अप्रेशन डाइरेक्टर कुन्दन गिरीले डीपीएलजस्तो लोकप्रिय प्रतियोगितासँग जोडिन पाएकोमा गर्व भएको बताए । डीपीएलका निर्देशक शाहीले पनि श्री एयरलाइन्ससँगको सम्झौताले डीपीएललाई झन् भव्य बनाउन उर्जा मिलेको बताए ।
दोस्रो संस्करणको डीपीएलको विजेताले २५ लाख नगद पाउने छ । त्यस्तै, उपविजेताले १० लाख, तेस्रोले ३ लाख र चौथोले २ लाख नगद पुरस्कार प्राप्त गर्नेछन् । प्रतियोगिता चैत १७
गतेदेखि धनगढीस्थित अञ्चल प्रहरीको एसएसपी क्रिकेट मैदानमा हुनेछ । डीपीएलको अक्सन भने यही फागुन ९ गते हुँदैछ । प्रतियोगितामा टिम चौराह धनगढी, सीवाईसी अत्तरिया, रुपन्देही च्यालेन्जर्स, महेन्द्रनगर युनाइटेड, काठमाडौं गोल्डेन्स र विराटनगर किंग्स रहेका छन् ।