काठमाडौं । सलमान खानसँग स्टेज सेयर गर्ने नेपाली कलाकारको टुङगो लागेको छ । आयोजकका अनुसार नेपाली गायक राजेश पायल राई, विजय लामाले ‘द दबङ टुर’ मा गीत गाउने छन् ।
राजेश र विजय लामासँगै सुष्मा कार्की र माला लिम्बुले पनि उक्त स्टेज कार्यक्रममा नृत्य प्रस्तुत गर्ने छन् । बाँकी केही कलाकारको भोली (मंगलबार) सम्म टुङगो लाग्ने आयोजक ओडिसी इन्टरटेन्मेन्टका प्रवन्ध निर्देशक सिमान्त गुरुङले जनकारी दिए ।
गुरुङका अनुसार राजेश र विजय लामाले ट्रयाकमा गाउने छन् भने लामा र कार्कीले पनि ट्रयाकमै नृत्य गर्नेछन् ।
“अहिले द–दबङ द टुरका म्यानेज ग्रुप नेपाल आएको छ,” गुरुङले भने, “कार्यक्रमलाई कसरी ब्यबस्थित बनाउने भन्नेबारे आज पनि छलफल भयो ।”
फागुन २६ गते बलिउड स्टार सलमान खान नेपाल आउँदैछन् ।
सलमानको ‘द–दवङ द टुर’ अन्तरगत सलमानसँगै नायिका सोनाक्षी सिन्हा, निर्देशक प्रभु देवा, डेजी शाह, कृति सेनोन र पञ्जाबी भांगडा डान्सर ‘मिड बोस’ पनि आउने छन् । कन्र्सटमा सलमान र कट्रिनाले एकसाथ स्टेजमा प्रस्तुति दिने छन् । सलमानले करिब १ घण्टा स्टेजमा बिताउने आयोजकले जनाएको छ । आयोजक अहिले प्रोडक्सन र सुरक्षा ब्यबस्थापनको काम गरिरहेको गुरुङले जानकारी दिए ।
५० हजार दर्शक उपस्थित हुने अपेक्षा आयोजकले गरेको छ । “ब्रायन एडम्स आउँदा झण्डै २० हजार दर्शकले टिकट किनेका थिए,” गुरुङले भने, “ब्रायन एडम्सका तुलनामा सलमान नेपाल र नेपालीका लागि सलमान परिचित भएकाले ५० हजार दर्शक आउने अपेक्षा गरेका छौं । ”
कार्यक्रमबाट १५ करोड रुपैयाँ टिकटबाट उठाउने योजना रहेको गुरुङको भनाइ छ ।