एजेन्सी । सरसफाइका सामानहरु दैनिक प्रयोग गर्ने व्यक्तिको फोक्सोपछि गम्भीर असर पर्ने हालै गरिएको अनुसन्धानमा पत्ता लगाइएको बीबीसीले बताएको छ । 

६ हजार मानिसहरुमा गरिएको सर्वेक्षणपछि यस्तो नतिजा निकालिएको नर्वे युनिभर्सिटी अफ बर्जनले बताएको हो । यस अध्ययनमा पुरुषभन्दा महिला धेरै प्रभावित हुने गरेको पाइएको छ ।

दैनिक सरसफाइ गर्दा प्रयोगमा आउने केमिकलयुक्त सामग्रीहरु वास्तवमा अनावश्यक भएको र सफाइका लागि कपडा र पानी नै पर्याप्त हुने अनुसन्धानकर्ताहरुले सुझाव दिएका छन् । 

यस क्षेत्रमा बेलायतका विज्ञहरुले पनि सबैलाई आफ्नो घरमा हावा पस्न मिल्ने गरि खुल्ला राख्न र सकेसम्म स्प्रे केमिकल भन्दा पानीको प्रयोेग गरि सरसफाइ गर्नु उचित हुने बताएका छन् ।

नर्वेको वर्जन अनुसन्धान टिमलाई नेतृत्व गरिरहेका प्रोफेसर सेसाइलले भने, ‘दैनिक केमिकलजन्य पदार्थहरु प्रयोग गर्दा त्यसले पुर्याउने हानि पनि समयसँगै बढ्दै जान्छ र हाम्रो उमेर पुग्दासम्म फोक्सोलाई पूर्ण रुपमा काम नलाग्ने बताइदिन सक्छ ।’

अमेरिकन थोर्याकिक सोसाइटीको स्वासप्रस्वास सम्बन्धि जर्नलमा २० वर्षको अध्ययनपछि प्रकाशित गरिएको जानकारीलाई पनि अनुसन्धानमा आधार मानिएको छ । सर्वेक्षण गरिएका मानिसहरुको फोक्सोलाई जाँच गरि पहिले उनीहरुको सास फेर्न सक्ने क्षमताबारे अध्ययन गरिएको थियो । 

यसमा वर्ष बित्दै जाँदा महिलाहरुमा फोक्सोको क्षमता कम हुँदै गइरहेको पाइयो । 

जसपछि अनुसन्धानकर्ताहरुले सरसफाइका क्रममा प्रयोग गरिने रासायनिक सामग्रीले फोक्सोमा दिर्घकालीन क्षति पर्ने गरेको पत्ता लगाएका हुन् । 

त्यस्तै सरसफाइको काम गर्ने र नगर्ने दुुवै पुरुषहरुमा गरिएको जाँचमा भने यसको कुनै संकेत फेला नपरेको बताइएको छ । जसकारण अध्ययनकर्ताहरुले थोरै पुरुषले मात्र सरसफाइको काम गर्ने गरेकाले वा महिलामा केमिकलको बढी असर पर्ने हुन सक्ने निष्कर्ष निकालेका हुन् । 

त्यसैले अहिले विज्ञहरुले सफाईको काम गर्दा सकेसम्म केमिकलजन्य सामानको प्रयोग नगर्न र केबल पानीलाई नै पर्याप्त रुपमा प्रयोग गर्न सल्लाह दिएका छन् ।
http://www.bbc.com/news/health-43085674