म्यानचेस्टर सिटी एफए कपबाट बाहिरियो

म्यानचेस्टर सिटी एफए कपबाट बाहिरियो

एजेन्सी । इंग्लिश प्रिमियर लिग लिडर म्यानचेस्टर सिटी एफए कप फुटबलको पाँचौ चरणबाट बाहिरिएको छ । सोमबार राति लिग वान क्लब विगान एथलेटिक्ससँग १–० ले स्तब्ध हुँदै सिटी प्रतियोगिताबाट बाहिरिएको हो ।

घरेलु मैदानमा विगानलाई जित दिलाउन विल ग्रिगले निर्णायक गोल गरेका थिए । दोस्रो हाफ १० खेलाडीमा सिमित बनेको सिटीबिरुद्ध खेलको ७९ औं मिनेटमा ग्रिगले निर्णायक गोल गरेका थिए ।  एफए कपमा यो सिजन ग्रिगको यो सातौं गोल हो । पहिलो हाफको इन्जुरी समयमा फाबियन डेल्फ रातो कार्ड पाउदै मैदानबाट बाहिरिएपछि सिटीमा १० खेलाडीमा सीमित भएको थियो ।

प्रिमियर लिगमा १० अंकको अग्रता लिएको सिटीले बल पोजिसनमा ८३ प्रतिशतले पकड जमाएपनि गोल गर्न नसक्दा घरेलु टोलीसँग स्तब्ध बनेको हो । विगानको पोस्टमा सिटीले २९ पटक धावा बोलेपनि ५ प्रहार सहि दिशामा गएको थियो ।

योसँगै सिटी सन् २००४ – ५ को सिजनपछि पहिलोपटक तेस्रो डिभिजनको क्लबसँग पराजित हुँदै एफए कपबाट बाहिरिएको हो । सन् २००४ – ५ को सिजन सिटी ओल्डह्यामसँग १ – ० ले पराजित भएको थियो ।

सिटीलाई स्तब्ध बनाएर क्वाटरफाइनलमा स्थान बनाएको विगानले अब सेमिफाइनल प्रवेशको लागि साउथह्यामटनसँग खेल्ने छ । यस्तै एफए कप अन्तर्गत नै अन्य क्वाटरफाइनल खेलमा लेष्टर सिटीले चेल्सी, म्यानचेस्टर युनाइटेडले ब्राइटनसँग खेल्ने छ ।

प्रतिकृया दिनुहोस