काठमाडौं । नेकपा एमाले र माओवादी केन्द्रबीच भएको सातबुँदे सहमतिपछि सरकार विस्तारको लागि बाटो खुलेको छ ।

माओवादी केन्द्रका अध्यक्ष पुष्पकमल दाहालले सोमबार राति बालुवाटारबाट बाहिरिने क्रममा पत्रकाररुसँग संक्षिप्त कुरा गर्दै अब सरकारमा सहभागीताको लागि बाटो खुलेको जानकारी दिए ।

यसअघि नेकपा माओवादी केन्द्रले पार्टी एकताको विषयमा ठोस सहमति नभए सरकारमा नजाने स्पष्ट अडान लिँदै आएको थियो । “अब सरकारमा सहभागी हुन्छौं,” दाहालले संक्षिप्त प्रतिक्रिया दिँदै भने ।

त्यसैगरी नेकपा एमालेका उपाध्यक्ष वामदेव गौतमले पनि सकेसम्म मंगलबार बेलुकासम्म सरकार विस्तारको तयारी भएको जानकारी दिए । माओवादीका एक नेताका अनुसार आज बेलुकासम्म सरकारमा सहभागी हुनेहरुको नाम प्रधानमन्त्री केपी शर्मा ओलीलाई बुझाउने तयारी छ ।