एजेन्सी । इटालियन क्लब नापोली युरोपा लिग फुटबलबाट बाहिरिएको छ । युरोपा लिग अन्तर्गत बिहीबार राति भएको अन्तिम ३२ को दोस्रो लेगमा आरबि लेपजीङलाई २ – ० ले हराएपनि नापोली अवे गोलको आधारमा पराजित हुँदै प्रतियोगिताबाट बाहिरिएको हो ।
जर्मन क्लब आरबि लेपजीङलाई उसैको मैदानमा हराउन नापोलीका पियोट जीलिन्स्की र लोरेन्जÞो इन्सिग्नले समान एक एक गोल गरे । पहिलो हाफको ३३ औं मिनेटमा जीलिन्स्कीले गोल गर्दै नापोलीलाई सुरुवाती अग्रता दिलाए । खेलको ८६ औं मिनेटमा इन्सिग्नले गोल गरेपछि नापोली २ – ० ले विजयी भयो । तर, यो जितले नापोलीलाई अन्तिम १६ मा पुर्राउँन सकेन ।
पहिलो लेगमा लेपजीङसँग ३ – १ ले पराजित भएकै कारण इटालियन सिरी ए लिग लिडर नापोली अन्तिम १६ मा पुग्न असफल भएको हो । दोस्रो लेगपछि लेपजीङ र नापोलीबिचको खेल समग्रमा ३ – ३ गोलको बराबरीमा सकियो । दुई टोलीबीचको खेल समग्रमा बराबरी भएपछि नापोलीलाई उसैको मैदानमा ३ – १ ले हराएको कारण अवे गोलको आधारमा लेपजीङ विजयी हुँदै अन्तिम १६ मा पुग्न सफल भयो ।
नापोली बाहिरिएपनि अर्को इटालियन क्लब एसी मिलान भने युरोपा लिगको अन्तिम १६ मा पुगेको छ । बिहिबार राति भएको दोस्रो लेगमा लुडोगोरेट्स राज्गार्डलाई १ – ० ले हराउँदै समग्रमा ४ – ० को जितसहित एसी मिलान अन्तिम १६ मा पुगेको हो । दोस्रो लेगमा एसी मिलानलाई जित दिलाउन फाबियो बोरिनीले निर्णायक गोल गरे ।