एजेन्सी । स्पेनिस क्लब एथ्लेटिको मड्रिडले युरोपा लिग फुटबलको अन्तिम १६ को यात्रा तय गरेको छ । अन्तिम ३२ अन्तर्गत बिहीबार राति भएको दोस्रो लेगमा एफसी कोपनहेगनलाई १ – ० ले हराउँदै समग्रमा ५ – १ को जित निकाल्दै एथ्लेटिको मड्रिडले अन्तिम १६ मा स्थान बनाएको हो ।
घरेलु मैदानमा भएको दोस्रो लेगमा एथ्लेटिको मड्रिडलाई जित दिलाउन केभिन गामिरोले निर्णायक गोल गरे । डेनीस क्लब कोपनहेगनविरुद्ध गामिरोले पहिलो हाफको सातौं मिनेटमा गोल गरेका थिए । त्यसपछि दुवै टोलीले थप गोल गर्न सकेनन् र खेल एथ्लेटिको मड्रिडले १ – ० ले जित्यो । यसअघि पहिलो लेगमा एथ्लेटिको मड्रिडले कोपनहेगनलाई उसैको मैदानमा ४–० ले हराएको थियो ।
यस्तै अर्को स्पेनिस क्लब एथ्लेटिको बिल्बाओले पनि युरोपा लिगको अन्तिम १६ मा स्थान बनाएको छ । बिहीबार घरेलु मैदानमा भएको दोस्रो लेगमा रुसको स्पार्टक मस्कोसँग २ – १ ले पराजित भएपनि समग्रमा ४ – ३ ले जित निकाल्दै एथ्लेटिको बिल्बाओ अन्तिम १६ मा पुगेको हो ।
मस्कोको घरेलु मैदानमा भएको पहिलो लेगमा सहज जित निकालेकै कारण एथ्लेटिको बिल्बाओ युरोपा लिगको अर्को चरणमा पुगेको हो । पहिलो लेगमा एथ्लेटिको बिल्बाओले ३–१ को जित निकालेको थियो ।