काठमाडौं  । नेपाल कम्युनिष्ट पार्टीका महासचिव नेत्रविक्रम चन्द ‘विप्लव’विरुद्ध कपिलवस्तु प्रहरीले पक्राउ पुर्जी जारी गरेको छ । चन्दमाथि ज्यान मार्ने उद्योग र विस्फोटक पदार्थ ओसारपसारको मुद्दाको कसुरमा भोजपुर जिल्ला अदालतले पक्राउ गर्न आदेश दिएपछि प्रहरीले पुर्जी जारी गरेको हो । विप्लवको जन्मस्थान रोल्पाको इरिवाङ भए पनि हाल उनको ठेगाना कपिलवस्तुको शिवराज नगरपालिका वडा नम्बर १ मा पर्छ ।

जिल्ला प्रहरी कार्यालय कपिलवस्तुले नेता विप्लवलाई पक्राउ गरेर जानकारी दिन प्रहरी कार्यालय चन्द्रौटालाई निर्देशन दिएको छ । चन्दको चन्द्रौटास्थित घरमा पक्राउ पूर्जी टाँसिएको छ । माघ १० गते नै विप्लवविरुद्ध पक्राउ पुर्जी जारी भएपनि बुधबार (आज)मात्रै घरमा पुर्जी टाँसिएको हो । नेकपाले प्रतिनिधिसभा र प्रदेशसभाको निर्वाचनमा देशैभर बम विस्फोट गराएको थियो ।

नयाँ सरकार गठन भएपछि मात्रै नेकपाका स्थायी समिति सदस्य हेमन्तप्रकाश ओली र केन्द्रीय नेता पदम राईसहित दर्जन बढी नेता कार्यकर्तालाई प्रहरीले पक्राउ गरेको छ । पक्राउ पूर्जी जारी गरेको जिल्ला प्रहरी कार्यालय कपिलवस्तुका डिएसपी नरेन्द्र कार्कीले पुष्टि गरेका छन् । यसअघि विप्लवसँगै एउटै पार्टीमा रहेका रामबहादुर थापा ‘बादल’ गृहमन्त्रीकै रुपमा प्रहरी मुख्यालय गएकै दिन विप्लवमाथि प्रक्राउ पुर्जी जारी भएको हो ।