काठमाडौं । गीतकार गंगाराज मुकारुङ र जीवन मुकारुङका गीतहरुको श्रव्यदृष्य एल्बम सार्वजनिक गरिएको छ । 

महासेनानी पनि रहेका गीतकार गंगाराजको ‘पिखुवा खोला बगेझैँ’ बोलको गीत र जीवनको ‘चियाबारीको पातैपात’ एल्बममा समेटिएका छन् । 

गंगाराजको गीतमा भोजपुरका राई जातिको संस्कृति, पिखुवा खोलाको बाइस जंँघार तरेर चतरा आइपुग्नुपर्ने विगतको बाध्यता, अरुण नदीको परिवेश आदि तथा जीवनका गीतमा इलामेली परिवेश, चियाबारी, माईपोखरी आदि विषय छन् । 

ती गीतमा संगीतकार वसन्त मुकारुङले संगीत दिएको छ भने अशोक मुकारुङ र मुस्कान मुकारुङको स्वर छ । एल्बमा विज्ञान राई र जीवन मुकारुङले निर्देशन गरेका छन् ।  

गीतकार संघ नेपालको आयोजनामा भएको कार्यक्रममा साहित्यकार नवराज लम्सालले ‘इलामे शहर चियाबारी राम्रो’ बोलको गीतबाट परिचित गीतकार गंगाराजले नयाँ गीतमा भोजपुरको संस्कृति र मानवीय संवेदनालाई प्रस्तुत गर्न सफल भएको बताए ।  

संगीतकार आभाषले ती गीत ‘स्वान्त सुखायःका’ रुपमा आएका तर बजारबाट निर्देशित नभएको बताए ।  गीतकार मञ्चका अध्यक्ष चूडामणि देवकोटाले ती गीतमा माटो र संस्कृति सबै मिलेको बताए । रासस