एजेन्सी । पश्चिमी भारतको पुने शहरमा चिकित्सकले नै तान्त्रिक बोलाएर आईसीयुभित्र झारफुक गरेपछि सो भिडियो सामाजिक संजालमा अहिले भाइरल भएको छ । तर यस क्रममा बिरामीको मृत्यु भएपछि भने घटनाले गम्भीर रुप लिएको स्थानीय सञ्चारमाध्यमले बताएका हुन् ।
यसपछि २५ वर्षीया सन्ध्याका आफन्तले सो अस्पतालमाथि प्रेतआत्मा भगाउन भन्दै अन्धविश्वासको पछि लागि सही उपचार नगरेकाले बिरामीको मृत्यु भएको आरोप लगाएका हुन् ।
सन्ध्याको स्तनमा एउटा सानो गाँठो देखिएपछि उपचारका लागि उनी प्राइभेट अस्पताल चलाइरहेका डाक्टर शतिस चभनकहाँ पुगेको डेलीमेलको समाचारमा उल्लेख छ ।
तर चभनले दुईपटक शल्यक्रिया गर्दा पनि सफल हुन नसकेपछि आईसीयुभित्रै आफ्नो साथमा तान्त्रिक ल्याएर झारफुक गरेको परिवारको आरोप छ ।
मृतकका आफन्तले बताएअनुसार ती तान्त्रिकले झोलाबाट कागती र रातो कपडा निकालेर टाउकोदेखि खुट्टासम्म मन्त्र जप्दै केही गरिरहेका थिए । तर आफूहरुलाई भने यसबारेमा कुनै खबर नभएकाले प्रमाणका लागि मोबाइलमा सबै रेकर्ड गरेको उनीहरुले बताए ।
तर उता अस्पतालको प्रशासनले भने आफ्ना कर्मचारीहरु अन्धविश्वास सम्बन्धि कुनै कार्यमा संलग्न नभएको बताइरहेको छ । घटनामा संलग्न डाक्टरको समेत अस्पतालसँग कुनै सम्बन्ध नरहेको प्रशासनको भनाइ छ ।
उनीहरुले सन्ध्याको मृत्युको खबर भने सुनाइसकेका छन् । उनको स्वास्थ्यमा केही गम्भीर समस्या देखिएकाले उनलाई त्यहाँ भर्ना गरिएको तर उपचार हुन नसक्दा अङ्ग फेल भइ उनको मृत्यु भएको अस्पतालले बताएको हो ।
तरपनि प्रशासनले आईसीयूभित्रको भाइरल भिडियो सम्बन्धि चाहिँ कुनै बयान नदिएको हुँदा घटनाबारे थप अनुसन्धान गरिने बताइएको छ । मृतकका परिवारले दोषी डाक्टर र अस्पतालविरुद्ध लापरबाहीको मुद्दा चलाइसकेको परिवारले बताएको छ ।