काठमाडौं । नेपाल क्रेडिट एण्ड कमर्श बैंक (एनसीसी) को बोर्ड बैठकमा नेपाल प्रहरीको केन्द्रीय अनुसन्धान ब्यूरो (सीआईवी) ले छापा मारेको छ । ऋण दुरुपयोग गरेको अभियोगमा बोर्ड बैठकमा छापा मारेर केही पदाधिकारी र कर्मचारीलाई शुक्रबार बागबजारमा जारी बोर्ड बैठकबाटै नियन्त्रणमा लिइएको प्रहरी स्रोतले जानकारी दिएको छ ।
बैंकमा करिब डेढ अर्ब रुपैयाँ घोटाला भएको भन्दै उजुरी परेपछि अनुसन्धानका लागि नियन्त्रणमा लिइएको सीआईबी स्रोतले जानकारी दिएको छ ।
“एनसीसी बैंकमा भएको घोटाला सम्बन्धी उजुरी छानविनका लागि अनुसन्धान सुरु गरेका हौं,” सीआईवी प्रमुख पुष्कर कार्कीले भने, “अनुसन्धान हुँदैछ । घटनाका बारेमा छिट्टै सार्वजनिक गर्नेछौं ।”
एनसीसी बैंकसँग केही समय पहिले मर्ज भएको एपेक्स बैंकको ऋण दुरुपयोग सम्बन्धी विषय भएको स्रोतले जानकारी दिएको छ । एपेक्सका तत्कालीन पदाधिकारी र व्यवस्थापनको मिलेमतोमा ऋण दुरुपयोग भएको बताइएको छ ।
नेपाल राष्ट्र बैंकले एनसीसी बैंक घोटाला प्रकरणका दोषीलाई कारवाही गर्न पत्र पठाएको २ सातापछि केन्द्रीय अनुसन्धान ब्यूरोले बैंकमा छापा मारेको हो ।
सीआईबीको टोलीले बागबजारमा रहेको केन्द्रीय कार्यालय र अन्य शाखाहरुबाट अहिलेसम्म २० जनालाई पक्राउ गरेको जनाएको छ ।
एनसीसी बैंकमा नक्कली पुर्जा राखेर ऋण दूरुपयोग गरेको आरोपमा नेपाल राष्ट्र बैंकले अनुसन्धान सुरु गरेको थियो ।
एनसीसी बैंकसँग मर्ज भएको एपेक्स डेभलपमेन्ट बैंकसँग सम्बन्धित ऋण दूरुपयोग भएपछि राष्ट्र बैंकले सीआईबीलाई कारवाहीका लागि पत्र लेखेको थियो ।
झण्डै २ अर्ब (२ सय करोड) ऋणमध्ये ४४ करोड रुपैयाँ भुक्तानी भइसकेको बताइएको छ । अझै १ सय ५६ करोड रुपैयाँ ऋण उठ्न नसक्ने अवस्थामा पुगेपछि राष्ट्र बैंकले एनसीसीलाई ऋणको नोक्सानी ब्यवस्थापन गर्न यसअघि नै निर्देशन समेत दिएको थियो । एपेक्स डेभलपमेन्ट बैंकका तत्कालीन अध्यक्ष विष्णुप्रसाद धिताल र ऋण व्यवस्थापन शाखाको मिलोमतोमा रकम दुरुपयोग भएको देखिएको स्रोतको दाबी छ । यद्यपी घोटाला प्रकरणमा को–को संग्लन थिए भन्ने राष्ट्रबैंकको प्रतिवेदन गोप्य राखिएको छ । स्रोतका अनुसार तत्कालीन अध्यक्ष धिताल र उनको टिमले काठमाडौं, भक्तपुर, झापा, धादिङ लगायतका जिल्लामा नक्कली जग्गाको पुर्जा बनाएर योजनामै ऋण प्रवाह गरेका थिए ।
मर्ज हुनुअघि एपेक्स डेभलपमेन्ट बैंकको कार्यालय हात्तिसार काठमाडौंमा थियो ।