दमक । बादी समुदामाथिको विवेक ओझाकृत ‘ऐलानी’को दमकमा परिचर्चा भएको छ । गजल र कथाबाट साहित्यमा पैताला डोर्याएका ओझाले बादी समुदायको सामाजिक मनोदशामा आधारित भएर उपन्यास–लेखनमा डेब्यु गरेका हुन् ।
शनिबार देशको सुदूरपूर्वी सहर दमकमा आयोजित परिचर्चामा बोल्दै मुनाराज शेर्माले ‘ऐलानी’ले बादी समुदायको पहिचान सादृष्य उतारेको आशय प्रकट गरे ।
‘ऐलानी’ पहिचानको विम्ब भएको बताउँदै आफ्नै समुदायलेमात्रै पहिचानको आन्दोलन सिर्जना गर्नुनपर्ने भन्दै लेखकप्रति खुसी प्रकट गरे ।
उपन्यासलाई बलशाली बनाउन लेखक कतै चुकेको उल्लेख बताए । त्यस्तै सर्जक सीमा आभासले उपन्यासमा नारी पात्र कमजोर रहेका बताउँदै ‘ऐलानी’ महिला सशक्तिकरणलाई ओगट्न नसकेको प्रष्ट्याइन् ।
त्यस्तै उनले नेपाली साहित्यमा महिलालाई अत्यन्त दया र कमजोर पात्रको रूपमामात्र चित्रण गरिनु दुखद् भएको प्रशंग कोट्याइन् ।
कार्यक्रममा लेखक ओझाले आफूले समाजको हुबहु चित्र उतारेर सम्बन्धित निकायलाई र इतर समाजलाई घच्घच्याउन चाहेको बताए । उनले ‘ऐलानी’ बादी समुदायको सानो अंशमात्रै भएको बताउँदै त्यस विषयमा अनेक किताब लेख्न सकिनेसमेत बताए । कार्यक्रमलाई घनश्याम पथिकले सहजिकरण गरेका थिए ।